Хитай баянатчиси хуа чүнйиң «америкадики мәсчитләрниң сани шинҗаңдики мәсҗитләрниң ондин биригиму йәтмәйду» дәп җар салған

Мухбиримиз ирадә
2020-06-11
Елхәт
Пикир
Share
Принт

Америка ташқи ишлар министирлиқи 10-июн күни өзиниң йиллиқ диний әркинлик доклатини елан қилип, хитайдики диний әркинлик вәзийитини қаттиқ тәнқид қилған иди. Мәзкур доклатта уйғурларниң хитайдики дини бастуруш сияситиниң қаттиқ зиянкәшликигә учраватқанлиқи йорутулған иди.

Бүгүн, йәни 11-июн күни хитай ташқи ишлар министирлиқиниң баянатчиси хуа чүнйиң буниңға инкас қайтуруп: «америка дини ишларни баһанә қилип, җуңгониң ички ишлириға арилашти», дәп қақшиған. У американиң диний әркинлик доклатини «пакитларға һөрмәт қилмиған, бир тәрәплимилик билән толған» дәп әйиблигән вә хитайда «диний әркинликниң капаләткә игә икәнлики» һәққидә җар салған. У мундақ дегән: «хитайда 200 милйонға йеқин динға етиқад қилғучи амма, 380 миңдин артуқ диний зат вә тәхминән 5500 диний тәшкилат бар. Хитайдики һәр милләт кишилири диний етиқад әркинликидин толуқ бәһримән болмақта.»

Техиму қизиқарлиқи шуки, хуа чүнйиң сөзидә америкадики мәсчитләр саниниң уйғур елидики мәсчитләр саниниң ондин биригиму йәтмәйдиғанлиқини тилға алған. Әмма у уйғур елидики мәсҗитләрниң асасий җәһәттин вәйран қилинип болғанлиқини, көпинчилириниң тақақ икәнликини, лагерлар йолға қоюлғандин буян һечкимниң мәсчиткә киришкә җүрәт қилалмайдиғанлиқини тилға алмиған.

Америка ташқи ишлар министирлиқиниң йиллиқ диний әркинлик доклатида өткән бир йилда уйғурларниң диний әркинликиниң давамлиқ яманлашқанлиқи, уларниң диний вә миллий кимлики сәвәблик лагерларға тутулғанлиқи, көплигән кишиләрниң мәҗбурий ғайиб қиливетилгәнлики, роһий вә җисманий җәһәттин қийин-қистаққа елинғанлиқи шундақла мәҗбурий әмгәккә селиниватқанлиқи баян қилинған.

Пикирләр (0)
Share
Толуқ бәт