Һүсәнҗан җелилниң аяли канада һөкүмитини йолдишини унтуп қалмаслиққа чақирди

Мухбиримиз әркин
2019-01-25
Share

Канада билән хитай оттурисида партлиған «хуавей кризиси» хитай түрмисидики канада пуқраси һүсәнҗан җелилниң канададики аилә тавабиатлиридә әндишә пәйда қилған.

Һүсәнҗан җелилниң аяли камилә тиләндибайеваниң канада таратқулириға билдүрүшичә, у һүсәнҗан җелилниң мәсилиси «хуавей кризиси» ниң көләңгисидә қелишидин әндишә қилмақта икән. Канада әдлийә тармақлири өткән йили 12‏-айда хитайниң юқири техникилиқ карханиси‏-хуавей ширкитиниң муавин мудири, қошумчә баш боғалтири мең вәнҗуни қолға алған. Арқидинла хитай һөкүмити хитайда турушлуқ канада пуқралиридин бирқанчә кишини тутқун қилип, улардин бир кишини «әткәсчилик» билән әйибләп өлүм җазасиға мәһкум қилған иди. Канададики «йәр шари хәвәрлири» телевизийә қанилиниң билдүрүшичә, камилә тиләндибайева, канада һөкүмитиниң «мең вәнҗу вәқәси» сәвәблик һүсәнҗан җелилни қутқузуш тиришчанлиқидин ваз кечишидин әндишә қилидиғанлиқини билдүргән.

Һүсәнҗан җелил 2006‏-йили канададин өзбекистанға туғқан йоқлашқа барғанда тутқун қилинип, хитайға өткүзүп берилгән. У 2007‏-йили «бөлгүнчилик» билән әйиблинип муддәтсиз қамаққа буйрулған иди. Хитай даирилириниң илгири сүрүшичә, 2016‏-йили униң қамақ җазаси 20 йилға қисқартилған.

Һүсәнҗан җелил мәсилиси илгири канада таратқулирида көп тилға елинған болсиму, лекин йеқинқи йилларда пүтүнләй унтулуп қелинған иди. Бу қетим «йәр шари хәвәрлири» қанили униң мәсилисини қайта күнтәртипкә қойған. Камилә тиләндибайева «йәр шари хәвәрлири» гә қилған сөзидә, бу йил 1‏-март йетип кәлсә униң 50 яшқа киридиғанлиқини билдүрүп, «мән канада һөкүмитиниң техиму көп күч чиқиришини тәләп қилимән» дегән. Униң илгири сүрүшичә, канаданиң бурунқи һөкүмити һүсәнҗан җелил мәсилисидә көп тиришчанлиқ көрсәткән болсиму, лекин һазирқи баш министир җастин тредо хитайға йетәрлик бесим ишләтмигән. Лекин «йәр шари хәвәрлири» ниң билдүрүшичә, канада ташқи ишлар министирлиқиниң баянатчиси һүсәнҗан җелилниң түрмигә қамилишидин қаттиқ әндишә қилип кәлгәнликини билдүрүп, «биз бу мәсилини юқири дәриҗиликләр учришишлирида давамлиқ оттуриға қойимиз» дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт