Hüsenjan jélilning ayali kanada hökümitini yoldishini untup qalmasliqqa chaqirdi

Muxbirimiz erkin
2019-01-25
Share

Kanada bilen xitay otturisida partlighan "Xu'awéy krizisi" xitay türmisidiki kanada puqrasi hüsenjan jélilning kanadadiki a'ile tawabi'atliride endishe peyda qilghan.

Hüsenjan jélilning ayali kamile tilendibayéwaning kanada taratqulirigha bildürüshiche, u hüsenjan jélilning mesilisi "Xu'awéy krizisi" ning kölenggiside qélishidin endishe qilmaqta iken. Kanada edliye tarmaqliri ötken yili 12‏-ayda xitayning yuqiri téxnikiliq karxanisi‏-xu'awéy shirkitining mu'awin mudiri, qoshumche bash boghaltiri méng wenjuni qolgha alghan. Arqidinla xitay hökümiti xitayda turushluq kanada puqraliridin birqanche kishini tutqun qilip, ulardin bir kishini "Etkeschilik" bilen eyiblep ölüm jazasigha mehkum qilghan idi. Kanadadiki "Yer shari xewerliri" téléwiziye qanilining bildürüshiche, kamile tilendibayéwa, kanada hökümitining "Méng wenju weqesi" seweblik hüsenjan jélilni qutquzush tirishchanliqidin waz kéchishidin endishe qilidighanliqini bildürgen.

Hüsenjan jélil 2006‏-yili kanadadin özbékistan'gha tughqan yoqlashqa barghanda tutqun qilinip, xitaygha ötküzüp bérilgen. U 2007‏-yili "Bölgünchilik" bilen eyiblinip muddetsiz qamaqqa buyrulghan idi. Xitay da'irilirining ilgiri sürüshiche, 2016‏-yili uning qamaq jazasi 20 yilgha qisqartilghan.

Hüsenjan jélil mesilisi ilgiri kanada taratqulirida köp tilgha élin'ghan bolsimu, lékin yéqinqi yillarda pütünley untulup qélin'ghan idi. Bu qétim "Yer shari xewerliri" qanili uning mesilisini qayta küntertipke qoyghan. Kamile tilendibayéwa "Yer shari xewerliri" ge qilghan sözide, bu yil 1‏-mart yétip kelse uning 50 yashqa kiridighanliqini bildürüp, "Men kanada hökümitining téximu köp küch chiqirishini telep qilimen" dégen. Uning ilgiri sürüshiche, kanadaning burunqi hökümiti hüsenjan jélil mesiliside köp tirishchanliq körsetken bolsimu, lékin hazirqi bash ministir jastin trédo xitaygha yéterlik bésim ishletmigen. Lékin "Yer shari xewerliri" ning bildürüshiche, kanada tashqi ishlar ministirliqining bayanatchisi hüsenjan jélilning türmige qamilishidin qattiq endishe qilip kelgenlikini bildürüp, "Biz bu mesilini yuqiri derijilikler uchrishishlirida dawamliq otturigha qoyimiz" dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet