Канаданиң хитайда турушлуқ әлчисиниң һөсәнҗан җелилни «хитай пуқраси» дейиши униң аялиниң наразилиқини қозғиди

Мухбиримиз әркин
2020-02-14
Share

Өткән һәптә канаданиң хитайда турушлуқ баш әлчиси доминик бартонниңканада парламентида гуваһлиқ берип, хитай түрмисидики канада пуқраси һөсәнҗан җелилни «канада пуқраси әмәс» дейиши, һөсәнҗан җелилниң аяли вә канада парламентиниң бәзи әзалириниң қаттиқ тәнқидигә учриған.

Доминик бартонниң сөзи канада парламентида муназирә қозғап, канада ташқи ишлар министири франшиос филиппе доминик бартонниң сөзигә чүшәнчә беришкә мәҗбур болған. Франшиос филиппе доминик бартонниң сөзини түзитип, канада һөкүмити һөсәнҗан җелилниң канада пуқраси икәнликини етирап қилидиғанлиқини билдүргән. 

Доминик бартон өткән һәптә канада парламентиниң авам палатасида гуваһлиқ бәргәндә консерватип парламент әзаси гарнет гениюсниң һөсәнҗан җелил һәққидики соалиға җаваб берип, һөсәнҗан җелилни «канада пуқраси әмәс» дегән. Униң сөзи парламент әзалирини, һөсәнҗан җелилниң аилиси вә канададики уйғурлар вә кишилик һоқуқ тәшкилатлирини һәйран қалдурған.

Һөсәнҗан җелилниң аяли камилә тиләндибайева канададики «дөләт почтиси» тор гезитиниң зияритини қобул қилип, бартонниң сөзигә наразилиқ билдүргән. У, һөсәнҗан җелилниң канада пуқраси икәнликидә һечқандақ гуман йоқлиғини тәкитләп, өзидә буниңға даир «барлиқ һөҗҗәтләрниң барлиқи» ни билдүргән. У йәнә «либераллар 14 йилдин бери түрмидә йетиватқан йолдишимниң қоюп берилиши үчүн техиму күчиши керәк» дегән. 

Доминик бартон канада парламентида гуваһлиқ берип әтиси канада ташқи ишлар министири франшиос филиппе авам палатасида сөз қилип, һөсәнҗан җелилниң канада пуқралиқини етирап қилидиғанлиқини тәкитлигән.

«Дөләт почтиси» гезитиниң билдүрүшичә, франшиос филппе, «биз һәр бир канадалиққа қилип келиватқандәк хитай һөкүмитиниң канада әмәлдарлирини униң билән көрүштүрүп, униң әһвалини билиши, униңға ярдәм беришигә йол қоюшни чақиримиз» дегән.

Һөсәнҗан җелил 2006‏-йили өзбекистанда тутқун қилинип, хитайға өткүзүп берилгән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт