Ikki kanada puqrasi öz dölitige qaytti, hüseyin jélildin héch xewer yoq

Muxbirimiz jewlan
2021-09-27
Share

Xu'awéy shirkiti xojayinining qizi méng wenjo xitaygha qayturup bérilgendin kéyin, xitay terepmu ikki neper kanada puqrasini qoyup bergen bolup, yeng ichidiki bu sodida xitayning yenggenliki keng teshwiq qilinip kelmekte.

"Cholpan" (The star) torida ikki kanadaliqning axiri öz öyige qaytip kelgenliki, emma kanada puqrasi hüseyin jélilning teqdirining néme bolup ketkenlikidin héchkimning kari bolmaywatqanliqi heqqide bir maqale élan qilin'ghan.

Maqalide mundaq déyilgen: "Maykél kawring bilen maykél spawor 1020 kün türmide naheq yatqandin kéyin öyige qaytip kélip xushal boldi. Emma türmide yétiwatqan üchinchi kanadaliq néme bolup ketti? 2006-yildin béri türmide yétiwatqan hüseyin jélilning qamaqtiki künliri uningdin nechche hesse köp idighu?"

Maqalide éytilishiche, hüseyin jélil xitay türmiside yétiwatqandin béri kanadaning birer konsolimu uni yoqlap qoymighan. 5 Yil burun xitay hökümiti uning anisi we hedisi bilen bolghan alaqisini üzüwetken bolup, hazirghiche uning ehwalining qandaqliqi, ölük yaki tirikliki namelum iken.

Hüseyin jélil 2001-yil b d t teripidin étirap qilin'ghan musapirlar qatarida kanadagha kelgen bolup, 2005-yil kanada puqraliqigha ötken. Shu yili u ayalini élip özbékistandiki tughqanlirini yoqlighili barghanda, özbékistan da'iriliri uni tutup xitaygha tapshurup bergen؛ xitay uning kanada puqraliqini étirap qilmighan.

Maqalide körsitilishiche, xitay hökümiti maykél kawring bilen maykél spaworni tutqun qilghandin kéyin, kanada taratquliri her waqit bu mesilige diqqet qilip kelgen, emma hüseyin jélilni untup ketken. Kanada hökümiti eger adil bolimen deydiken, hüseyin jélilning iz-dérikini qilishi, barliq chariler bilen uni qutuldurup, ayali we töt balisi bilen jem qilishi kérek iken, shundaq bolghanda barliq kanadaliqlarning köngli aram tapidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet