Kishilik hoquq teshkilatliri kanada bash ministérining hüsenjan jélilni qutquzushini telep qildi

Muxbirimiz erkin
2017-12-01
Share

Xelq'ara kechürüm teshkilati bilen kishilik hoquqni közitish teshkilati kanada bash ministiri jastin trédoning xitay ziyaritide uning xitay türmisidiki kanada puqrasi hüsenjan jélil qatarliq bezi siyasiy mehbuslarning qoyup bérishige küch chiqirishini telep qilghan.

Kanada bash ministérining xitay ziyariti kéler hepte bashlinidu. Xelq'ar kechürüm teshkilati kanada shöbisining mes'uli aléks newé 29‏-noyabir térédogha yazghan mektupida xitay türmisidiki 16 mehbusning tizimlikini élan qilip, bolupmu uning hösenjan jélil, falun'gongchi chyen sün, we xitay öktichisi wang bingjangning mesilisige alahide köngül bölüshini telep qilghan.

Alékis newéning mektupida mundaq déyilgen: "Kanada erkin soda kélishimi arqiliq xitay bilen bolghan munasiwetni chongqurlashturushni oylishiwatqan bir waqitta xalighanche tutqun qilin'ghan, qanunsiz qamalghan we xitay türmiliride her xil kishilik hoquq depsendichilikige duchar boluwatqan kanadaliqlar we uninggha alaqidar kishiler siz köngül bölidighan muhim mesile bolushi kérek. Buning ichidiki bezi délolargha 10 yildin ashti. Bu kishilerning qoyup bérilishi üchün küch chiqirishingizni kütimiz."

Kishilik hoquqni közitish teshkilati kanada shöbisining mes'uli farida de'if 30‏-noyabir élan qilghan mektupida, téridoning ziyariti uning kishilik hoquqni otturigha qoyushi üchün muhim purset ikenlikini tekitligen. Farida de'if, xitayning yéqinda teywenlik pa'aliyetchi li mingchini qamaq jazasigha höküm qilghanliqi, ötken hepte adwokat jyang tyenyongning késilgenliki, nobél tinchliq mukapatining sahibi lyu shawboning ayalining bu yil 7‏-aydin béri iz-dérikining yoqluqini eskertip, "Kanada puqrasi hüsenjan jélil 10 yildin béri kanada diplomatliri bilen körüshelmey ömri xitay türmiside ötüwatidu," dep tekitlen'gen. U yene téridoning xitayni lyu shya we türmidiki bashqa mehbuslarni qoyup bérishke chaqirishini, eger undaq qilmisa, buning xitaygha yol qoyup, kanadaning qimmet qarishigha xiyanet qilghanliq bolidighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet