Xitaydiki tunji aptonomiye - ichki mongghul aptonom rayoni 70 yilliqini xatirilidi

Muxbirimiz gülchéhre
2017-05-02
Share

1-May da'iriler kokxotta ichki mongghul aptonom rayoni qurulghanliqining 70 yilliqini xatiriligen. Ichki mongghul aptonom rayoni 1947-yili 5-ayning 1-küni qurulghan bolup. Xitay kommunist hökümiti bésiwalghan rayonlarda qurghan tunji aptonom rayoni hésablinidu.

Da'iriler teshwiqat xewerliride, 70 yildin buyan ichki mongghulni "Döletlik nuqtiliq tereqqiyat, échiwétish sinaq rayoni" qilip qurup chiqishqa a'it siyasetlerni yürgüzüp kelgenlikini, maliye mexsus meblighini yilmu-yil ashurghanliqini, shundaqla yer siyasiti, ixtisasliqlar siyasiti qatarliq tereptin türler boyiche qollash tedbirini qollinip, köp qatlamliq tereqqiyat güllinishlerge érishtürgenlikini körsetken. Xitay metbu'atliri xewerliride yene, ichki mongghul aptonom rayoni omumiy ishlepchiqirish qimmitining aptonom rayon qurulghandin buyan 642 hesse kötürülgenlikini yazghan.

Merkizi nyuyorktiki ichki mongghuliye kishilik hoquq uchur merkizi qatarliq mongghul teshkilatliri xitayning ichki mongghulda yürgüzüwatqan siyasetke qarshi bayanatlirida, mongghullarning aptonomiye siyasitidin behrimen bolalmayla qalmay, xitay da'irilirining mongghul yaylaqlirini weyran qilip mongghullarning yashash muhitini tehditke uchratqanliqini éytqan we xitay hökümitining adil bolmighan siyasetlirining mongghullarning namratliqta qélishigha, assimilyatsiye bolushigha seweb boluwatqanliqini, xitay köchmenlerning barghanche köpiyip, mongghullarning bolsa öz aptonom rayonida az sanliqqa aylinip qalghanliqini shikayet qilip kelmekte.

1947-Yilida ichki mongghul nopusi 800 ming bolup, ichki mongghulning hazirqi omumiy nopusi 25 milyon'gha yetken, buning ichide mongghullar 4 milyon 600 ming, qalghan asasliq qismini xitay nopusi igileydu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet