Xitayda falun'gung, Uyghur we tibet wijdan mehbuslirining ichki ezasini keng kölemlik köchürüsh dawamliq yüz bergen

Muxbirimiz erkin
2016.06.23
Share on WhatsApp
Share on WhatsApp

Zhurnalist we pa'aliyetchiler charshenbe küni doklat élan qilip, xitayda falun'gung, Uyghur we tibet wijdan mehbuslirining ichki ezasini keng kölemlik köchürüsh ehwali dawamliq yüz bériwatqanliqini bildürdi.

800 Betlik bu doklatni kanadaliq adwokati deywid matas, sabiq kanada diplomati deywid kilgor we amérikiliq zhurnalist étan gutmanlar yézip chiqqan. Doklatta körsitishiche, xitayda her yili köchürülidighan adem ichki ezasi xitay hökümiti élan qilghandin zor derijide artuqken.

Xitay hökümiti xitayda her yili 10 ming ichki eza köchürülidighanliqini élan qilghan idi. Emma deywid matas charshenbe küni amérika döletlik axbarat kulubida chaqirghan axbarat yighinida, hazir xitayda her yili 100 mingdin artuq ichki eza köchürülidighanliqini bildürdi.

Doklatta körsitishiche, bu ichki ezalarning asasliq kélish menbe'i falun'gungchilar, Uyghurlar we tibet wijdan mehbusliriken. Ular xitaydiki ichki eza köchüridighan doxturxana, kariwat sani we bashqa ashkara uchurlargha asasen bu xulasini chiqarghan.

Xitay hökümiti 2015‏-yildin bashlap mehbuslarning ichki ezasini köchürüshni toxtitip, peqet puqralar i'ane qilghan ichki ezalarni köchüridighanliqini jakarlighan idi. Emma zhurnalist gutman charshenbe künki axbarat yighinida, puqralar i'ane qilghan ichki eza nahayiti az qismini teshkil qilidighanliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.