Uyghur diyaridiki ijtima'iy pen sahesining tetqiqat nishanigha yolyoruq bérildi

Xitay hökümiti bashqurushidiki “Tengritagh tori” ning 20-iyundiki xewiride éytilishiche, 19-nöwetlik “Shinjang ijtima'iy penler sahesi” ning yilliq yighini shu küni chaqirilghan.

Xewerde éytilishiche, yighinda “Siyasiy mewqeni téximu yükseldürüsh” eng muhim wezipe qatarida tilgha élin'ghan. Shuning bilen birge ijtima'iy pen sahesining tetqiqat we izdinishlerde “Töt tonush” (siyasiy tonush, chong weziyet tonushi, shi jinping yadroluqi tonushi we merkezlik bilen birdeklik tonushi), “Töt ishench” (xitayche alahidilikke ige sotsiyalizm yoligha bolghan ishench, nezeriye ishenchi, tüzümge bolghan ishench, medeniyetke bolghan ishench) we “Ikkini himaye qilish” (shi jinping yadroluqidiki partiye merkiziy komitétini himaye qilish we partiye merkiziy komitétining bir tutash rehberlikini himaye qilish) ni qet'iy dawamlashturush lazimliqi, ijtima'iy pen sahesining nöwettiki “Partiyening yéngi dewrdiki shinjangni idare qilish istratégiyesini izchillashturush, jungxu'a kimliki qarishini mustehkemlesh we shinjangdiki islam dinini xitaychilashturush” témiliri boyiche téximu köp eserlerni wujudqa chiqirishi tekitlen'gen. Shuning bilen birge kompartiyening ijtima'iy pen sahesige bolghan mutleq rehberlikini izchillashturush lazimliqi bir türlük siyasiy wezipe qatarida tilgha élin'ghan.

Yighinning etisi, yeni 20-iyun küni Uyghur aptonom rayonluq partkomning sékrétari ma shingruy medeniyet-sen'et, tarix we arxé'ologiye sahesidiki inistitutlarni közdin kechürgen. Bu jeryanda mang shingruymu “Medeniyet arqiliq shinjangni sughirish” qurulushini kücheytip, “Partiyening yéngi dewrdiki shinjangni idare qilish istratégiyesini izchillashturush” telipini otturigha qoyghan.

Xitay re'isi shi jinpingni “Hazirqi ‛töt tonush‚ni ‛besh tonush‚qa chiqirishqa urunmaqta” dep tenqidligen xitay öktichi ziyaliysi chén pokong radiyomizning ilgiriki ziyaretliri jeryanida “Xitay kompartiyesi herqachan ijtima'iy penlerni destek qilish arqiliq kishilerning dunyaqarishini özlirining menpe'etige mas kélidighan shekilde shekillendürüshke küch serp qilidu” dégenidi. Nöwette xitay hökümitining Uyghur diyaridiki shunche köp zulum we qirghinchiliq melum boluwatqanda ijtima'iy pen sahesi üchün bu xil yéngi “Siyasiy nishan” ni békitip bérishi Uyghurlarning tarixi, medeniyiti we bashqa sahelirige da'ir téximu köp saxta eserlerning wujudqa kélishini tézlitidu, dep qaralmaqta.