Xotende yene 573 kishi "Ikki yüzlimichilik" ke chétilghan

Muxbirimiz irade
2017-12-21
Share

Xoten wilayiti yéqinda yene uqturush chiqirip, 573 neper asasiy qatlam kadirini "Ikki yüzlimichilikke chétishliq," dep élan qilghan.

"Xoten géziti" ning xoten wilayetlik intizam tekshürüsh komitétining qararini menbe körsitip tarqatqan xewiridin melum bolushiche, xoten wilayiti yéqinda ikki biwasite qarashliq organ, 25 yéza-bazar we 17 kenttiki "Ikki yüzlimichi" kadirlarni we "Ikki yüzlimichilik" qilghanlarni bayqash boyiche üchinchi qétimliq "Tekshürüsh" élip barghanliqi melum.

Tekshürüsh jeryanida 573 neper kishige munasiwetlik mesile bayqalghan, 31 kishige délo turghuzulghan, 25 kishige partiye ichide agahlandurush jazasi bérilgen. Chet'ellerdiki Uyghur közetküchiler, bu kadirlarning qalghanlirining "Yépiq terbiyelesh merkezliri" ge ewetilgen bolushi mumkinlikini perez qilmaqta.

Xewerde éytilishiche, xoten da'iriliri "Xoten wilayitining közitish xizmitini yolgha qoyush charisi" we "Xoten wilayitining 2017-yilidin 2021-yilighiche bolghan közitish xizmetliri ölchimi" qatarliq tüzümlerge asasen "Ikki yüzlimichi" lerge qarshi turushni yenimu kücheytish üchün tötinchi qétimliq közitish xizmitini bashlighan iken.

Uyghur aptonom rayonluq da'iriler ötken yildin buyan Uyghur élida, bolupmu asasiy qatlamda atalmish "Ikki yüzlimichi" lerni tazilash kürishi élip bérip, nurghun Uyghur kadirlarni jazalighan, bezilirini hetta edliye orunlirigha tapshurup bergen idi. Radiyomiz igiligen uchurlarda herqaysi wilayet we sheherlerde shiddet bilen kéngeytiliwatqan "Yépiq terbiyelesh merkezliri" ge yighiwélin'ghan Uyghur kadirlarning mutleq köp qismining oxshash bolmighan derijide "Ikki yüzlimichilik" qilmishigha chétilip qalghanlar ikenliki aydinglashqan idi. Yuqiridiki 2021-yilighiche élan qilin'ghan charidin bu xizmetning yene dawamlishidighanliqi melum bolmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet