Xelq'ara kishilik hoquqni közitish teshkilati xitayni Uyghur filim ishligüchi we rézhissor ikram nurmemetni derhal qoyup bérishke chaqirdi

Xelq'ara kishilik hoquqni közitish teshkilati xitay hökümitini siyasiy jinayet bilen eyiblinip 6 yérim yilliq qamaq jazasigha höküm qilin'ghan Uyghur filim ishligüchi we rézhissor ikram nurmemetni derhal qoyup bérishke chaqirdi.

Mezkur organ 17-öktebir küni ikram nurmemet üchün mexsus bayanat élan qilip, uning erkinlikini telep qilghan hemde démokratik hökümetlerni xitaygha bésim ishlitishke dewet qilghan.

Kishilik hoquqni közitish teshkilatining xitay ishliri bölümi mu'awin diréktori maya wang bayanattiki sözide mundaq dégen:

“Xitay hökümiti shinjangda xorlash xaraktérlik qattiq zerbe bérish herikitini bashlighan yette yildin köprek waqittin kéyinmu, ikram nurmemetke oxshash Uyghur yashlirini siyasiy jinayetler bilen eyibleshni dawam qilmaqta. Ikram nurmemet we shuningdek naheq türmige tashlan'ghan yüz minglighan Uyghurlar derhal qoyup bérilishi kérek”.

Ikram nurmemet, béyjingda yashaydighan bolup, u, élanchiliq we filim sen'iti bilen shughullinidighan yash rézhissor idi. U, ötken yilining otturiliri béyjingdin tutup kétilgen we yil axirida ürümchide sotlan'ghan. Uning tutulushi we sotlinishigha, birqanche yil awwal türkiyede marmara uniwérsitétida oqush we türk filim shirketliride ishlishining seweb bolghanliqi melum.

Radiyomiz igiligen uchurlarda, ikram nurmemet we uning 4 neper dostining “Térrorluq guruhi qurush” jinayiti bilen eyiblen'genliki, ikram we dostlirining ayrim-ayrim halda 5 yildin 6 yérim yilliqqiche késilgenliki, ikramning soraq jeryanida qiyin-qistaq destidin atalmish jinayitini qobul qilishqa mejbur bolghanliqi aydinglashqan idi.

Xelq'ara kishilik hoquqni közitish teshkilati bayanatida, ikram nurmemet uchrighan qiyin-qistaqni eyibligen. Ular xitayning jinayi ishlar dewa qanunida qiynash arqiliq érishken ispatlarni ishlitishni cheklen'gen dep yézilsimu, emeliyette sotchilarning bu ispatlarni asasen bikar qilmaydighanliqini we qiynashqa uchrighan jawabkarlarni ezeldin aqlimaydighanliqini bildürgen.

Kishilik hoquqni közitish teshkilati bayanatida yene, xitay hökümitining “26 Sezgür dölet” tizimlikini turghuzup chiqip, bu döletlerni ziyaret qilghan bolush yaki uruq-tughqanliri bolushnimu jinayet qilip békitkenlikini we nurghun Uyghurlarni bu boyiche jazalighanliqini we bundaq jazalashlarning hélihem dawam qiliwatqanliqini eskertken.