Филим ишлигүчи икрам нурмәмәтниң сорақ җәрянида қийин-қистаққа учриғанлиқи ашкариланған

Вашингтондин мухбиримиз ирадә тәйярлиди
2023.11.09

Хитай сақчилири бу йил 5-айниң 29-күни бейҗиңдин тутуп кәткән филим ишлигүчи икрам нурмәмәт 27-өктәбир күни сотқа чиқирилған. У сотта өзиниң сорақ җәрянида қийин-қистаққа елинғанлиқини вә ялған иқрар беришкә мәҗбурланғанлиқини дегән.

Икрам нурмәмәтниң әһвалини билидиғанларниң “муһапизәтчи” гезитигә ашкарилишичә, икрам нурмәмәт 27-өктәбир күни үрүмчи оттура хәлқ сот мәһкимисидә сотқа чиқирилған, у “террорлуқ” паалийитини тәшкилләш вә “шәрқий түркистан бөлгүнчи” тәшкилатиға қатнишиш дегән җинайәтләр билән әйибләнгән.

Бу йил 32 яшқа киргән икрам нурмуһәммәт истанбулдики мармара университетиниң кино ишләш кәспидә алтә йил оқуған болуп, у кейин бейҗиңда олтурақлишип, уйғурларниң турмушини әкс әттүргән қисқа филимларни ишлигән. Бу филимлар хитай ичи вә сиртидики филим фестиваллириға қатнаштурулған икән.

Икрам нурмәмәт сотта өзи һәққидики әйибләшләрни рәт қилип: “мән қараңғу өйдә 20 күн тутуп турулдум вә қейин-қистаққа елиндим. Мән түркийәдики чеғимда һечқандақ террорлуқ тәшкилатиға яки һечқандақ сиясий паалийәткә қатнашмидим” дегән.

Сотқа нурмәмәтниң аяли вә униң ата-аниси қатнашқан болуп, улар икрам нурмәмәт бейҗиңдики өйидә қолға елинип үрүмчигә елип кетилгәндин бери көрүшәлмигән икән.

 “муһапизәтчи” гезитиниң игилишичә, икрам нурмәмәтниң өзи халиған адвокатни яллишиға йол қоюлмиған болуп, һөкүмәт бәлгилигән адвокат униңға вәкиллик қилған. Бу адвокат икрамниң аилисидикиләргә икрамниң “сәккиз йилдин юқири муддәтлик қамақ җазасиға һөкүм қилиниши мумкин” ликини ейтип, идийәдә тәйярлиқ қилип қоюшни дегән. Адвокат йәнә, һөкүм “бир һәптә яки бир қанчә йилдин кейин елан қилиниши мумкин” дегән.

Икрам нурмәмәт бу йил 5-айда тутулуп кетиштин бир ай бурун, үрүмчидики сақчилар уни чақирип, кимлик йитип кетиш әһвалини тәкшүридиғанлиқини ейтқан. Икрам үрүмчигә қайтишни рәт қилған вә телефонни үзүвәткән. Униң кейин хәвәр тепишичә, у истанбулдики вақтида күтүвалған бир уйғур тутулғандин кейин, сақчилар униң пейигә чүшкән икән.

 “муһапизәтчи” гезитиниң хәвиридә ейтилишичә, хитай һөкүмити 2014-йилдики аталмиш “террорлуқ һуҗуми” дин кейин, түркийә, мисир, сәуди әрәбистан қатарлиқ дөләтләргә чиққан уйғурларни террорлуқ гумани билән тутуп түрмә-лагерларға солиған болуп, 2017-йил ичидила тутулғанларниң сани 500 миңға йәткән вә һәр бири оттура һесаб билән 12 йерим йил кесилгән.

Икрам нурмәмәтниң 2023-йил 5-айда бейҗиңдин тутулуши уйғурларға елип бериливатқан бастурушниң давамлишиватқанлиқини, уйғур сәр хиллириниң түрлүк бәтнамлар билән сотлинип түрмигә йоллиниватқанлиқидин дерәк бәрмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.