Ilham toxti bu yilliq nobél tinchliq mukapatining aldinqi 5 namzatining biri bolghan

Muxbirimiz erkin
2020-10-05
Élxet
Pikir
Share
Print

Xitay türmisidiki ataqliq Uyghur ziyaliysi ilham toxti bilen xongkongluq pa'aliyetchi neytin lu 2020-yilliq nobél tinchliq mukapatigha eng layiq aldinqi 5 namzat qatarigha kirgen.

Norwégiye nobél komitéti kéler hepte 5 namzat ichidin birini tallaydiken. Ilham toxti bilen neytin lu bu yil norwégiye qelemleshler merkizi teripidin namzaliqqa körsitilgen bolup, bu ilham toxtining 2019-yildin béri 2-qétim namzatliqqa qayta körsitilishidur. Buningdin burun u amérika dölet mejlisi ezaliri teripidin 2019-yilliq nobél tinchliq mukapatigha namzatliqqa körsitilgen idi.

"Oslo tinchliq tetqiqat instituti" ning torida élan qilin'ghan uchurda tekitlinishiche, nöwette nechche yüz namzat ichidin tallash élip bérilip, axirida ilham toxti we neytin lu qatarliq 5 namzat qélip qalghan. Qalghan namzatlar sudanliq oqughuchi ala salah we sudandiki "Erkinlik-özgirish küchliri teshkilati", rusiyelik öktichi aléksiy nawalni we uning "Parixorluqqa qarshi turush fondi", liwiye we somaliliq tinchliq pa'aliyetchisi hejer sherif bilen ilwad elman, "Zhurnalistlarni qoghdash komitéti" qatarliq shexs we orunlarni öz ichige alidiken.

"Oslo tinchliq tetqiqat instituti" ning toridiki uchurda tekitlishiche, "Nobél tinchliq mukapatining xitaydiki Uyghurlarning basturulushigha qarshi pa'aliyet élip barghan ilham toxtigha bérilishi, zulumgha uchrawatqan bu az sanliq milletning qiyinchiliqini téximu gewdilendürüshke, xitay hökümitige qarita 'xelq'ara jem'iyet közitiwatidu' dégen signalni bérishke yardimi bolidiken." uchurda yene "Ilham toxtidin héchqandaq xewer élinamisimu, lékin uning xizmiti we mirasining Uyghurlar hem ularning qollighuchiliri üchün küchlük simwul hem heriketlendürgüchi küch bolup kelgenliki" ilgiri sürülgen.

Ilham toxti 2014-yili 1-ayning 15-küni béyjingda "Bölgünchilik" bilen eyiblinip qolgha élin'ghan. 2014-Yili 9-ayning 22-küni ürümchide muddetsiz qamaqqa késiwétilgen idi.

Toluq bet