Илһам тохти бейҗиң даирилириниң уйғурларға қарита чәкимини күчәйткәнликини әйиблиди

Уйғур вәзийитини йеқиндин көзитип келиватқан тонулған уйғур зиялийси илһам тохти әпәнди, бейҗиң даирилириниң, “террорлуққа зәрбә беришни муқимлиқ сақлашниң алдинқи шәрти қилиш” намида, уйғурларға қаратқан чәклимиләрни күчәйткәнликини әйиблиди.

Уйғурбиз ториниң 4-ноябирдики хәвиридә дейилишичә, илһам тохти әпәнди сөзидә, 28-өктәбир тйәнәнмен мәйданидики аптомобил билән һуҗум қилиш вәқәсидин кейин, тиҗарәт, оқуш қатарлиқ сәвәбләр билән бейҗиңда туруватқан уйғурларниң тәкшүрүш обйекти қилинип, уларниң нормал паалийәтлири түрлүк чәклимиләргә йолуқуватқанлиқини билдүрүп, бейҗиң даирилириниң уйғурларға қарита чәкимини күчәйткәнликини әйиблигән.

28-Өктәбир тйәнәнмингә аптомобил билән һуҗум қилиш вәқәсидин кейин, бейҗиң шәһириниң партком секретари го җиңлуң вә бейҗиң шәһириниң шәһәр башлиқи ваң әншүн қатарлиқлар бейҗиңниң муқимлиқини сақлашта террорлуққа зәрбә беришни күчәйтишни тәкитлигән. Го җиңлуң сөзидә, “28-өктәбир тйәнәнмен террорлуқ һуҗум қилиш вәқәси бизгә күчлүк сигнал болди. Бейҗиң шәһириниң муқим вәзийитини сақлашта, диққәт обйектини сирттин келип өй иҗарә алғучиларға вә оттура, кичик типтики меһманханиларни тәкшүрүшкә қаритип, террорлуқниң алдини елишимиз керәк” дегән.

Улар сөзидә тәкшүрүш нишаниниң “уйғурлар” икәнликини очуқ демигән болсиму, әмма бейҗиңда тиҗарәт қиливатқан уйғурлар вә һәрқайси университетларда оқуватқан оқуғучилар чәтәл мухбирлириға өзлириниң нуқтилиқ тәкшүрүш обйектиға айланғанлиқини, уйғурларниң нормал паалийәтлири һәр хил тосалғуларға учриғанлиқини билдүргән.