Ilham toxti béyjing da'irilirining Uyghurlargha qarita chekimini kücheytkenlikini eyiblidi

Muxbirimiz méhriban
2013-11-05
Share

Uyghur weziyitini yéqindin közitip kéliwatqan tonulghan Uyghur ziyaliysi ilham toxti ependi, béyjing da'irilirining, "Térrorluqqa zerbe bérishni muqimliq saqlashning aldinqi sherti qilish" namida, Uyghurlargha qaratqan cheklimilerni kücheytkenlikini eyiblidi.

Uyghurbiz torining 4-noyabirdiki xewiride déyilishiche, ilham toxti ependi sözide, 28-öktebir tyen'enmén meydanidiki aptomobil bilen hujum qilish weqesidin kéyin, tijaret, oqush qatarliq sewebler bilen béyjingda turuwatqan Uyghurlarning tekshürüsh obyékti qilinip, ularning normal pa'aliyetliri türlük cheklimilerge yoluquwatqanliqini bildürüp, béyjing da'irilirining Uyghurlargha qarita chekimini kücheytkenlikini eyibligen.

28-Öktebir tyen'enmin'ge aptomobil bilen hujum qilish weqesidin kéyin, béyjing shehirining partkom sékrétari go jinglung we béyjing shehirining sheher bashliqi wang enshün qatarliqlar béyjingning muqimliqini saqlashta térrorluqqa zerbe bérishni kücheytishni tekitligen. Go jinglung sözide, "28-Öktebir tyen'enmén térrorluq hujum qilish weqesi bizge küchlük signal boldi. Béyjing shehirining muqim weziyitini saqlashta, diqqet obyéktini sirttin kélip öy ijare alghuchilargha we ottura, kichik tiptiki méhmanxanilarni tekshürüshke qaritip, térrorluqning aldini élishimiz kérek" dégen.

Ular sözide tekshürüsh nishanining "Uyghurlar" ikenlikini ochuq démigen bolsimu, emma béyjingda tijaret qiliwatqan Uyghurlar we herqaysi uniwérsitétlarda oquwatqan oqughuchilar chet'el muxbirlirigha özlirining nuqtiliq tekshürüsh obyéktigha aylan'ghanliqini, Uyghurlarning normal pa'aliyetliri her xil tosalghulargha uchrighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet