Ilham toxti xitay da'irilirining Uyghurlargha térrorluq qalpiqi kiygüzüwatqanliqini eyiblidi

Muxbirimiz méhriban
2013-11-18
Élxet
Pikir
Share
Print

Uzundin buyan Uyghurlarning hoquq-menpe'etini ochuq-ashkara teshebbus qilip kelgen ziyaliy ilham toxti ependi, 16-noyabir sériqbuya weqesidin kéyin, öz qarashlirini bayan qilip, xitay hökümet da'irilirini "Uyghurlargha térrorluq qalpiqi kiygüzmeslik" ke chaqirdi.

Ilham toxti ependi sériqbuya yézisida yüz bergen "23-Aprél weqesi" we "16-Noyabir weqesi" ning yüz bérish sewebi heqqide hökümet da'irilirining éniq melumat bermigenlikini bildürüp, bu weqelerning tepsilatining ashkarilinishi kéreklikini tekitlep "Bu weqelerning tepsilatliri ashkarilinishi kérek, oqqa tutushqa buyrughan bashliqtin, oqqa tutqan saqchilarghiche hemme tepsiliy jeryan ammigha ashkarilinishi kérek" dédi.

Ilham toxti ependi yene weqe heqqidiki gumanini bayan qilip, "Bu qétimqi weqedimu aldinqi qétimqigha oxshash nurghunlighan éniq bolmighan we gumanliq nuqtilar bar. Emma éniqki, bu xil toqunushlar üzlüksiz yüz bériwatidu, Uyghurlar we xenzularda we bashqa kishilerde ölüsh-yarilinish ehwalliri körülüwatidu" dégen.

Uyghurbiz tori we dunya awazi blogining xewiride yene, ilham toxti ependining xitay da'irilirining weqeni térrorluq hujumi dep békitkenlikige qarita so'alliri we tenqidliri mundaq neqil élin'ghan. "Sériqbuya yézisida zadi néme ish yüz berdi? heqiqiy ehwal zadi qandaq? méningche, kallisi saq adem bu weqeni térrorluq hujum dep qarimaydu. Bu xil weqeler üzlüksiz yüz bériwatidu, ejeba hökümet oylinishi kérek emesmu? némishqa qolida pichiqila bar Uyghurlar qolida qorali bolghan saqchilar bilen tirkishidu? yene 9 adem özini ölümge tutup bériptu. Yerlik da'iriler bu xil weqening qayta yüz bérishining aldini élishni oyliship baqmidi, hazirghiche yürgüzüwatqan siyasetliri toghrisida oylinip baqmidi."

Toluq bet