Jewher ilham dadisigha wakaliten "Saxarof mukapati" ni tapshurup aldi

Muxbirimiz erkin
2019-12-18
Élxet
Pikir
Share
Print

Yawropa parlaménti 18‏-dékabir küni murasim ötküzüp, türmidiki ataqliq Uyghur ziyaliysi ilham toxtigha bérilgen 2019‏-yilliq "Saxarof kishilik hoquq mukapati" ni tarqitip berdi. Mukapatni ilham toxtining amérikadiki qizi jewher ilham dadisigha wakaliten tapshurup aldi. Yawropa parlaménti bu yil 7‏-ayda bu yilliq saxarof mukapatining ilham toxtigha layiq körülgenlikini jakarlighanidi.

Murasimda yawropa parlaméntining prézidénti deywid sassoli nutuq sözlep: "Ilham toxti özining herikiti arqiliq Uyghurlargha awazi bolushni ishqa ashurdi. . . . . . . . U Uyghurlar bilen xitay xelqi otturisida di'alog we öz ara chüshenche hasil qilish üchün 20 yil xizmet qildi" dégen.

Jewher ilham murasimda sözligen nutqida, Uyghurlarning nöwettiki weziyitini xatirilitip, "Bügün xitayda Uyghurlargha erkinlik yoq. Mekteplerde, jama'et sorunlirida erkinlik yoq bolupla qalmay, öyliridimu erkinlik yoq. Dadam mutleq köp Uyghurlargha oxshash dawalinishqa, méngisi yuyulushqa tégishlik késellik-'zorawan esebi'dep békitildi. . . . . . . Hökümet esebiylik, dégen bu xata teripleshning sayiside bir milyon, belki uningdinmu köp kishini jaza lagérlirigha qamap, Uyghurlarni özining dini étiqadi, tili, medeniyitidin waz kéchishke qistimaqta, ten jazasigha uchrimaqta we beziler ölmekte" dep tekitligen. Jewher ilham yene kishilerni Uyghurlargha yardemge chaqirip: "Men bu zaldiki her qaysinglargha, shundaqla anglawatqanlargha shuni éytmaqchi, siz xitay hökümitining Uyghur xelqige tutqan mu'amiliside mesile barliqini körüwatamsiz? eger siz mesile barliqini körüwatqan bolsingiz, undaqta buni hel qilish üchün heriket qiling.".

Saxarof mukapati yawropa ittipaqining eng aliy kishilik hoquq mukapati bolup, mezkur mukapat sabiq sowét ittipaqi fizika alimi andréy saxarofning namigha tesis qilin'ghan. Mezkur mukapat hazirgha qeder Uyghurlar érishken eng yuqiri xelq'ara kishilik hoquq mukapati bolup hésablinidu.

Toluq bet