Bu yilliq gérmaniye “Wéymar kishilik hoquq mukapati” ilham toxtigha bérildi

Muxbirimiz erkin
2017.06.30

Gérmaniyening bu yilliq “Wéymar kishilik hoquq mukapati” türmidiki ataqliq Uyghur öktichi ziyaliysi ilham toxtigha bérilgen. Gérmaniye törün'gén radi'osining xewer qilishiche, wéymar sheherlik parlaménti bu yilliq “Wéymar kishilik hoquq mukapati” ni ilham toxtigha layiq körgen. “Wéymar kishilik hoquq mukapati” wéymar sheherlik parlamént teripidin tesis qilin'ghan bolup, ilham toxtini gérmaniye “Xeter astidiki xelqler jem'iyiti”, ilham toxtini qollash guruppisi qatarliq kishilik hoquq teshkilati we ammiwi guruhlar namzatliqqa körsetken. Mezkur mukapatning omumi sommisi 5000 yawro bolup, mukapat tarqitish murasimi bu yil 10‏-dékabirda ötküzülidu.

“Wéymar kishilik hoquq mukapati” ötken yili iranliq kishilik hoquq pa'aliyetchisi nergis muhemmidige bérilgen. Mukapat uning ölüm jazasigha qarshi turush yolida körsetken tirishchanliqigha we pidakarliqigha layiq körülgen idi. 

“Wéymar kishilik hoquq mukapati” gérmaniyediki etiwarliq kishilik hoquq mukapatlirining biri. Mezkur mukapat erkinlik, barawerlik, irqiy qirghinchiliqning aldini élish we uninggha qarshi turush, söz we uchur erkinliki, az sanliq milletlerning siyasiy, milliy, medeniyet we diniy hoquqlirini qozghash, ölüm jazasigha qarshi turush.... Qatarliq sahelerde aktip pa'aliyet élip barghan shexs we guruhlargha bérilip kelgen. 

Ilham toxti xitay merkizi milletler uniwérsitétining sabiq dotsénti bolup, u xitayning Uyghur rayonidiki qattiq qol siyasitige qarshi turghan. U, tor békiti qurup, Uyghurlar bilen xitaylar otturisidiki di'alogni algha sürüshke tirishqan bolsimu, biraq 2014‏-yili “Bölgünchilik” bilen qolgha élinip, muddetsiz qamaq jazasigha buyrulghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.