Вилсон мәркизи берия билән вишинскийниң или инқилабиниң әң йеңи әһвали һәққидә сталинға йоллиған мәхпий доклатини елан қилған

Мухбиримиз қутлан
2017-02-18
Share

Баш шитаби вашингтондики вилсон мәркизи йеқинда сабиқ совет иттипақи дөләт хәвпсизлик комитетиниң башлиқи лавренти берия билән ташқий ишлар министери вишинскиниң 1945-йили 29-априлда или инқилаби һәққидә сталинға йоллиған бир парчә мәхпий доклатини елан қилған.

Мәзкур доклат или инқилаби дәсләпки қәдәмдә ғәлибигә еришип, ғулҗа шәһири толуқ азад қилинған, әлихан төрә рәисликидики шәрқий түркистан җумһурийити һөкүмити вәзийәтни контрол қиливатқан, миллий армийә рәсмий қурулуп, шәрқ вә шималға қарап һәрбий йүрүш тәйярлиқи җиддий елип бериливатқан бир пәвқуладдә мәзгилдә йезилған.

Доклат ғулҗидики совет консули билән «2-өй» дики совет хадимлириниң москваға йоллиған әң йеңи учурлириға тайинип, сталинни или инқилабиниң нөвәттики вәзийитидин хәвәрдар қилған.

Мәхпий доклатта ғулҗа шәһириниң толуқ азад қилинип, қозғилаңчиларниң қолиға өткәнлики, гоминдаңниң бу йәрдики 2520 нәпәр әскириниң йоқитилғанлиқи, 2632 нәпәр әскириниң әсиргә чүшкәнлики, уларниң арисида 50 нәпәр һәр дәриҗилик офетсерниңму барлиқи тилға елинған.

Униңдин башқа доклатта йәнә ғулҗини азад қилиш урушида қолға чүшкән һәрбий қурал-ярағларниң тәпсилий сани вә тизими берилгән.

Доклатта йәнә ғулҗида қурулған шәрқий түркистан җумһурийити һөкүмитигә елихан төриниң рәислик қиливатқанлиқи, униң әйни вақитта советкә қарши паалийәтләрдә болуп 10 йил қамаққа кесилгәндә уйғур дияриға қечип келивалған диний зат икәнлики һәққидики учурларму қошумчә қилинған.

Доклатта ғулҗида турушлуқ миллий армийә адәм күчиниң 9300 кишигә йәткәнликини, кәлгүсидики икки ай ичидә миллий армийәниң 12 миң кишигә йетидиғанлиқини, буниңға алтайдики осман исламниң 4 кишилик қазақ әскирини қошқанда 16 кишилик зор күчкә айлинидиғанлиқи әскәртип өтүлгән.

Докладниң кейинки қисмида сталинға или инқилабини йәниму улғайтип алтайдин қәшқәргичә болған кәң районларға кеңәйтиш үчүн маддий вә һәрбий җәһәттин ярдәм қилиш тоғрисида мәхус тәклип сунулған. Мәзкур доклатниң ахириқи қисмидики тәпсилатларни кейинки шәнбидики қисқа хәвәрлиримиздә тонуштуримиз.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт