Уйғур районидики 12 идарә-орган бирликтә 2021-йиллиқ “интернет қилич һәрикити” ни йолға қойған

Интернет ториға қаритилған контроллуқни күчәйтиш үчүн уйғур аптоном районлуқ һөкүмәтниң 12 тармиқи бирликтә алаһидә һәрикәт қозғиған. Хитайниң “шинҗаң хәвәрләр тори” ниң хәвәр қилишичә, уйғур аптоном районлуқ базар башқуруш идариси, уйғур аптоном районлуқ партком тәшвиқат бөлүми, уйғур аптоном районлуқ партийә комитети тор башқуруш идариси, аптоном районлуқ җамаәт хәвпсизлики назарити қатарлиқ 12 орун бирликтә елип барған бу һәрикәткә “интернет қилич һәрикити” дәп нам берилгән.

2021-Йилдики интернет торини назарәт қилиш алаһидә һәрикити һәққидики хәвәрдә “‛интернет қилич һәрикити‚ дә тордики һәр хил қанунға хилаплиқ қилиш қилмишлири қаттиқ тәкшүрүлүп җазалиниду,” дейилгән. Хәвәрдә йәнә бу һәрикәттә тор содиси муһити яхшилинидиғанлиқи дейилгән болсиму, әмма чәт әлләрдики уйғур көзәткүчиләр бу һәрикәттики асаслиқ күчниң йәнила тордики мәзмунларни, сәзгүр учурларни қамал қилишқа қаритилидиғанлиқини мөлчәрлимәктә.