Qizil buyruq qanun zhornili: “Xitayning Uyghurlarni basturushta éntérpolni süyi'istiml qiliwatidu”

Muxbirimiz erkin
2021.09.09

Amérikadiki “Qizil buyruq qanun zhornili” da 7-séntebir maqale élan qilinip, xitayning Uyghurlarni basturushta éntérpol, yeni xelq'ara saqchi teshkilatini süyi'istimal qiliwatqanliqi tenqid qilin'ghan. Maqalide éytilishiche, ‍eger intérpol konkért tedbir qollinip, xitayning Uyghurlargha qarita “Qizil tashliq buyruq” élan qilish teleplirige qarita hushyar bolmisa, xitay intérpolning “Qizil tashliq buyruq” séstimisini süyi'istimal qilishni toxtatmaydiken.

“Xitayning intérpolning ‛qizil tashliq buyruqi‚ arqiliq shinjang rayoni we Uyghurlarni basturushi” mawzuliq bu maqalini intérpolning qizil tashliq buyruqi mesililiri boyiche mutexesissleshken amérikaliq adwokat mishél éstlund xanim qelemge alghan iken.

U xitayning bu yil 7-ayda marakeshning kasablanka ayrodromida tutup qélin'ghan Uyghur pa'aliyetchi idris hesen'ge “Qizil tashliq tutush buyruqi” chiqarghuzghanliqini misal keltürgen. U intérpol idrés hesenning “Qizil tashliq tutush buyruqi” ni bikar qilghan bolsimu, biraq bu weqe bilen xitayning xaraktéri özgermeydighanliqini bildürgen. Uning éytishiche, idris hesenning délosi xelq'araning diqqitini qozghighan we tenqidige üchrighan bolsimu, biraq bu xitayning kelgüside Uyghurlargha qarita yene “Qizil tashliq tutush buyruqi” chiqirishni telep qilmaydighanliqini körsetmeydiken.

Mishél éstlund maqalisining axirida mundaq dep yazghan: “Eger intérpol özi teshebbuskarliq bilen xitayning ‛qizil tashliq tutush buyruqi‚ élan qilish telipini téximu inchike tekshürmise, biz uning intérpolning qorallirini dawamliq qalaymiqan ishlitip, öktichiler we siyasiy reqiplirini basturushta qollinidighanliqini perez qilsaq bolidu.”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.