“интерпол” ниң башлиқи мең хоңвейниң долқун әйса мәсилиси сәвәблик моллақ атқанлиқи илгири сүрүлмәктә

Мухбиримиз сада
2018-10-08
Share

29-Сентәбир күни хитайға қайтқандин кейин йоқап кәткән хитай дөләт хәвпсизлики министирлиқиниң сабиқ муавин министири, “интерпол”, йәни хәлқара сақчи тәшкилатиниң башлиқи мең хоңвейниң хизмәттин истепа бәргәнлики мәлум болған.

“вашингтон почтиси” гезитиниң түнүгүн, йәни 7-өктәбир күни елан қилған хәвиригә асасланғанда, мең хоңвейниң хитай һөкүмити тәрипидин намәлум җинайәт билән тәкшүрүлүватқанлиқи ашкариланған. Шу күни “интерпол” униң истепанамисини қобул қилғанлиқ һәққидә баянат елан қилған. Баянатта “интерпол” ниң униң истепанамисини тапшуруп алғанлиқи тилға елинған болсиму, әмма мең хоңвейниң истепанамигә мәҗбурлаш астида қол қойған яки өз ихтияри билән имза чәккәнлики әскәртилмигән.

Хитайниң юқири дәриҗилик чирикликкә қарши туруш оргини йәкшәнбә күни мең хоңвейниң “қанунға еғир дәриҗидә хилаплиқ қилиш” җинайити билән тәкшүрүлүватқанлиқи тоғрисида бир җүмлилик баянат елан қилған. Һалбуки, униң хитайниң қайси қануниға қандақ хилаплиқ қилғанлиқи һәққидә һечқандақ тәпсилат берилмигән.

Һалбуки, “бүгүнки һиндистан” ториниң бүгүн елан қилған хәвиридә бу йил февралда дуня уйғур қурултийиниң рәиси долқун әйсаниң “интерпол” ниң “қизил рәңлик тизимлики” дин чиқириветилгәнлики вә хитайниң бу ишқа интайин нарази болғанлиқи әскәртилип өтүлгән. Хәвәрдә дейилишичә, мең хоңвей хитайға қайтиштин илгирила хитай һөкүмитиниң юқириқи вәқә сәвәблик уни моллақ атқузушқа аллибурун тәйярлинип болғанлиқи мумкин икән.

Радийомиз бу һәқтә хәлқаралиқ таратқулар тарқатқан хәвәрләргә асасән өткән җүмә күни мең хоңвейниң хитайға қайтқандин кейин из-дерәксиз ғайиб болғанлиқи һәққидә хәвәр бәргән иди. “бүгүнки һиндистан” тори бүгүн бу һәқтә йеңи учур берип, мең хоңвейниң долқун әйса мәсилиси билән хитайда җазалиниш алдида туруватқанлиқини илгири сүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт