Интерполға әза дөләтләрниң уни суйиистемал қиливатқанлиқи тәнқидләнди

Хәлқара адил сотлиниш тәшкилати доклат елан қилип, хәлқара сақчи тәшкилати-интерполға әза дөләтләрниң мәзкур органни мусапирлар, журналистлар, тинч сиясий паалийәтчиләрни җазалаш үчүн суйиистемал қиливатқанлиқини тәнқид қилди.

Доклатта, хитайниң өз вақтида интерпол арқилиқ һазирқи д у қ иҗраийә комитети рәиси долқун әйса үстидин қизил ташлиқ тутуш буйруқи чиқарғанлиқини мисал қилип, бу, әза дөләтләрниң мәзкур орган арқилиқ қизил ташлиқ тутуш буйруқи чиқарған нурғун делоларниң бири икәнликини көрсәткән.

Доклатта әскәртишичә, германийә сақчи даирилири 1999‏-йили униңға интерполниң қизил ташлиқ тутуш буйруқини көрситип, униң оттура асия әллиригә бармаслиқини агаһландурған.

Хәлқара адил сотлиниш тәшкилати, 2010-йили долқун әйсаниң архипини көрүшни тәләп қилған болсиму, бирақ интерпол архип контрол комитети 2012-йили 1-айда җаваб қайтуруп, униң архипи бар-йоқлуқи һәққидә учур беришни рәт қилған.

Интерпол низамнамисиниң 2‏-маддисида, бу орган һәр қайси әл сақчилириниң адәттики иҗтимаий җинайәтләрни паш қилиш, қолға елиш ишлирида һәмкарлиқ елип баридиған орган икәнлики қәйт қилинған. Униң 3‏-маддисида мәзкур органниң сиясий, диний, ирқий вә һәрбий характерлик һәрқандақ һәрикәткә арилишиши қәтий мәни қилинған иди.

Доклатта көрситишичә, бәзи әза дөләтләр интерполни суйиистемал қилип, қизил ташлиқ тутуш буйруқини сиясий қорал орнида қоллинип кәлгән. Интерполниң қаидә-түзүми буни тосушқа амалсиз икәнликини әскәртип, мәзкур органни дәрһал ислаһ қилишни тәләп қилған.