Intérpolgha eza döletlerning uni suyi'istémal qiliwatqanliqi tenqidlendi

Xelq'ara adil sotlinish teshkilati doklat élan qilip, xelq'ara saqchi teshkilati-intérpolgha eza döletlerning mezkur organni musapirlar, zhurnalistlar, tinch siyasiy pa'aliyetchilerni jazalash üchün suyi'istémal qiliwatqanliqini tenqid qildi.

Doklatta, xitayning öz waqtida intérpol arqiliq hazirqi d u q ijra'iye komitéti re'isi dolqun eysa üstidin qizil tashliq tutush buyruqi chiqarghanliqini misal qilip, bu, eza döletlerning mezkur organ arqiliq qizil tashliq tutush buyruqi chiqarghan nurghun délolarning biri ikenlikini körsetken.

Doklatta eskertishiche, gérmaniye saqchi da'iriliri 1999‏-yili uninggha intérpolning qizil tashliq tutush buyruqini körsitip, uning ottura asiya ellirige barmasliqini agahlandurghan.

Xelq'ara adil sotlinish teshkilati, 2010-yili dolqun eysaning arxipini körüshni telep qilghan bolsimu, biraq intérpol arxip kontrol komitéti 2012-yili 1-ayda jawab qayturup, uning arxipi bar-yoqluqi heqqide uchur bérishni ret qilghan.

Intérpol nizamnamisining 2‏-maddisida, bu organ her qaysi el saqchilirining adettiki ijtima'iy jinayetlerni pash qilish, qolgha élish ishlirida hemkarliq élip baridighan organ ikenliki qeyt qilin'ghan. Uning 3‏-maddisida mezkur organning siyasiy, diniy, irqiy we herbiy xaraktérlik herqandaq heriketke arilishishi qet'iy men'i qilin'ghan idi.

Doklatta körsitishiche, bezi eza döletler intérpolni suyi'istémal qilip, qizil tashliq tutush buyruqini siyasiy qoral ornida qollinip kelgen. Intérpolning qa'ide-tüzümi buni tosushqa amalsiz ikenlikini eskertip, mezkur organni derhal islah qilishni telep qilghan.