Xitay j x ministiri intérpol arqiliq Uyghur qoralliqlirigha taqabil turushni ümid qildi

Muxbirimiz erkin
2017-09-26
Share

Xitay jama'et xewpsizlik ministiri gu shingkün, xitayning xelq'ara saqchi teshkilati - intérpol bilen hemkarliship, sherqiy türkistan islam herikitige oxshash chet'eldiki qoralliq guruhlar ezalirining qaytip kélish xewpige qarshi mudapi'eni kücheytishni ümid qilidighanliqini bildürgen.

Roytérs agéntliqining xewer qilishiche, gu shingkun bu sözni xelq'ara saqchi teshkilatining 86‏-nöwetlik omumiy yighinida qilghan.

Intérpolning béyjingdiki yighini bashlinishtin bir kün burun kishilik hoquqni közitish teshkilati bu organning bash katipigha xet yézip, xitayning intérpolning jinayi ishlar gumandarlirigha chiqiridighan xelq'ara "Qizil uqturush" ni Uyghur siyasiy pa'aliyetchilirige we bezi xitay öktichilirige chiqirip, "Qizil uqturushi" ni suyi'istémal qiliwatqanliqi, intérpolning buninggha qarshi derhal tedbir élishini telep qilghan.

Xelq'ara kechürüm teshkilati yene, xitayning mu'awin j x ministiri, intérpolning hazirqi prézidénti méng xongwéyni tenqidlep, uning "Hoquqini ashkara suyi'istémal qilishi, bu teshkilatning inawitige dexli yetküzüwatidu" dégen.

Roytérs agéntliqining xewiride bildürüshiche, intérpolning 26‏-séntebir béyjingda bashlan'ghan yighinigha yene xitay re'isi shi jinping qatniship échilish nutqi sözligen. U, 3 künlük yighinning échilishida sözligen sözide, intérpolni qollaydighanliqini bildürüp, uningda téximu zor rol oynaydighanliqini tekitligen.

Shi jinping, "Xitay intérpolning dunya bixeterliki we muqimliqini qoghdashta oynawatqan roligha yuqiri baha béridu. Intérpolni dawamliq qollap, yer shari bixeterlik ishlirida téximu zor rol oynaydu" dégen.

Roytérs agéntliqining bildürüshiche, xitay bashqa döletlerning xiyanetchilik yaki atalmish térrorluqqa chétishliq gumandarlarni qayturup bérishini telep qilsimu, biraq u gumandarlarning qilmishigha da'ir yéterlik delil körsetmeydiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.