Iraq bash ministiri, da'ésh üstidin ghelibe qilghanliqini élan qildi

Muxbirimiz erkin
2017-07-10
Share

Iraq bash ministiri heyder el-abadi düshenbe küni iraq bixeterlik küchlirining atalmish islam döliti da'ésh üstidin ghelibe qilghanliqini jakarlidi.

Abadi düshenbe küni mosul kona shehirini azad qilghan iraq amanliq küchlirini közdin kechürgende, iraq bayriqini kötürüp, da'ésh térrorluq dölitining yoqalghanliqini resmiy élan qildi.

Iraq bixeterlik küchliri düshenbe küni da'éshning mosul kona sheher rayonini igilep turghan axirqi qalduq küchini yoqatqan. Mosulni azad qilish urushi 9 ay dawam qildi. Bu jeryanda nurghun qurulush weyran bolghan, minglighan insan ölgen, bir milyon'gha yéqin adem öy-makansiz qalghan.

Amérika bashchiliqidiki ittipaqdash küchler qomandanlirining bildürüshiche, mosul shehirini élish urushi 2‏-dunya urushidin béri élip bérilghan eng shiddetlik sheher urushi bolup qalghan. Biraq abadi, xewpning yene mewjutluqini agahlandurup, "Bizning yene bir wezipimiz bar. U bolsimu muqimliq berpa qilish, qurulush élip bérish we da'éshning qalduqlirini tazilash" dep körsetti.

B b s ning xewer qilishiche, amérika bashchiliqidiki ittipaqdash küchler, mosul kona shehiride minalarni tazilashqa, da'ésh qalduq küchlirini yoqitishqa toghra kélidighanliqini bildürgen.

Iraqdiki amérika armiyesining qomandani stéfan towsénd, "Bu ghelibining özi yalghuz da'éshni yoqitalmaydu. Aldimizda yene shiddetlik urushlar yüz béridu. Biraq da'ésh ikki paytextining biridin ayrildi. Atalmish xelipilikning parlaq künlirining yene kélishi tamamen imkansiz" dégen.

Da'ésh qoralliq küchliri mosulni 2014‏-yili 6‏-ayda ishghal qilghan. Da'éshning xelipisi abu bekir el baghdadi del 2014‏-yili 7‏-ayda mosuldiki meshhur el nuri tarixiy meschitide özini "Islam döliti" ning xelpisi dep élan qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet