Firansiye parlaménti Uyghur irqiy qirghinchiliqini resmiy étirap qildi

Firansiye parlaménti xitay hökümitining Uyghurlargha yürgüziwatqan zulumlirini “Irqiy qirghinchiliq” we “Insaniyetke qarshi jinayet” dep jakarlighan.

20-Yanwar peyshenbe küni firansiye parlaménti 1 ge qarshi 169 awaz bilen xitay hökümitining Uyghurlargha qaratqan zulumini “Irqiy qirghinchiliq” dep békitken. Igilinishiche, bu qarar firansiye prézidénti émmanu'él makronning partiyesiningmu qollishigha érishken iken.

Firansiye parlaméntida élan qilin'ghan qararda “Parlamént xitay xelq jumhuriyitining Uyghurlargha yürgüziwatqan zorawanliqini ‛irqiy qirghinchiliq‚ we ‛insaniyetke qarshi jinayet‚ dep resmiy étirap qilidu” diyilgen. Bu qarada yene fransiye hökümiti xelq'ara sewiyede, shundaqla xitaygha qaratqan tashqiy siyasitide zörür tedbirlerni qollinip, Uyghurlarni qoghdashqa chaqirilghan.

Fransiye parlaméntining 2022-yilidiki béyjing qishliq olimpik musabiqisige ikki hepte qalghan bir mezgilde élan qilghan bu tarixiy qarari, dunyaning herqaysi jayliridiki Uyghur jama'itini qattiq söyündürgen.

Amérika hökümiti tunji bolup, 2021-yili 19-yanwarda xitay hökümitining Uyghurlargha yürgüzgen basturushlirini “Irqiy qirghinchiliq” we “Insaniyetke qarshi jinayet” dep élan qilghan idi. Shuningdin kéyin, en'gliye, kanada, gollandiye, litwa, bélgiye, chéxiye qatarliq döletlerning parlaméntliri we amérika dölet mejlismu xitayning Uyghurlargha yürgüzgen zulumlirini “Irqiy qirghinchiliq” we “Insaniyetke qarshi jinayet” dep élan qildi. Fransiye parlaménti hazirgha qeder “Uyghur irqiy qirghinchiliqi” ni étirap qilghan dunyadiki 8-dölet parlaménti bolup qaldi.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar