Америка дөләт мәҗлиси әзалири хитайниң ирқий қирғинчилиқ җинайәтлирини қайта тәкитлиди

Вашингтондин мухбиримиз җәвлан тәйярлиди
2024.02.15

Америка дөләт мәҗлиси авам палата әзаси, америка-хитай риқабити алаһидә комитетиниң юқири дәриҗилик әзаси раҗа киришнаморти (Raja Krishnamoorthi) 14-феврал күни харвард университетида қилған сөзидә, хитайниң уйғурларға кәң көләмдә йүргүзүватқан ирқий қирғинчилиқини ениқ санлиқ мәлуматлар билән аңлитишқа тиришқан.

Америка-хитай риқабити алаһидә комитети 14-феврал күни бу һәқтә өзиниң X (тивиттер) һесабида елан қилған видийода, раҗа киришнаморти мундақ дегән: “23 милйон уйғур яшаватқан шинҗаңда ирқий қирғинчилиқниң йүз бериватқанлиқини һәммә адәм билиду. Хитай у җайда 23 милйон хәлқниң кимликини йоқитишқа урунмақта. 70 Миң аял мәҗбурий һалда туғмас қилинди, йүз миңлиған балилар ата-анисидин айриветилди, 2 милйондин 3 милйонғичә адәм йиғивелиш лагерлириға қамалди. Мәнчә бу, учиға чиққан тәлвилик. Биз буларни көрмәскә салалмаймиз”.

Униңдин башқа, 13-феврал күни америка дөләт мәҗлисидә, авам палата әзаси яң ким тонуштурған “уйғур сиясити қанун лайиһәси” билән, авам палата әзаси натанийил моран (Nathaniel Moran) тонуштурған “уйғур мәҗбурий әмгикини америка мәблиғидин халий қилиш қанун лайиһәси” ниң түзитиш киргүзүлгән нусхилири музакиригә қоюлғанда, натанийил моран өзи сунған қанун лайиһәси һәққидә тохтилип: “америка коммунист хитайниң уйғурларға елип бериватқан ирқий қирғинчилиқиға һәр қандақ усулда шерик болмаслиқиға капаләтлик қилиши керәк. ‛уйғур мәҗбурий әмгикини америка мәблиғидин халий қилиш қанун лайиһәси‚ америкадики баҗ төлигүчиләр төлигән долларниң уйғур мәҗбурий әмгикидин пайдилинидиған хитай ширкәтлиригә кетип қалмаслиқиға капаләтлик қилиду” дегән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.