Gollandiye parlaménti xitayning Uyghurlargha qiliwatqan zulumini “Irqiy qirghinchiliq” dep qobul qildi

25-Féwral peyshenbe küni gollandiye parlaménti awazgha qoyulghan teklip layihesini maqullap, Uyghur musulmanliri uchrighan mu'amilining irqiy qirghinchiliqqa barawer ikenlikini jakarlidi. Gollandiye bu xil bayanatni élan qilghan tunji yawropa döliti bolup qaldi.

Roytérs agéntliqining xewer qilishiche teklip layiheside mundaq déyilgen: “Xitay hökümitining tughut chekleshni meqset qilghan tedbirliri we jaza lagérlirini qurushtek bir qatar heriketliri birleshken döletler teshkilatining 260-nomurluq qarari, yeni ‛irqiy qirghinchiliqqa qarshi turush ehdinamisi‚ diki maddilargha mas kélidu. Xitaydiki Uyghurlargha ‛irqiy qirghinchiliq‚ yürgüzülüwatidu.”

Bügün bu xewer dunyaning herqaysi jayliridiki Uyghurlar we kishilik hoquq aktiplirini xursen qildi. Ular gollandiye parlaméntning bu qararini qizghin qarshi alidighanliqini bildürüshti.

Dunya Uyghur qurultiyi bu heqtiki bayanatida mundaq dédi: “Gollandiye parlaménti yawrupada tunji bolup xitayning Uyghurlargha qaratqan jinayitini irqiy qirghinchiliq dep étirap qilidighan teklip layihesini maqullidi. Dunya Uyghur qurultiyi gollandiye hökümitini bu layiheni özleshtürüshke we xelq'ara ittipaqdashliri bilen birlikte muwapiq tedbir qollinishqa chaqirimiz.”

Dunya Uyghur qurultiyining bayanatida yene: “Gollandiye parlaménti yawrupadiki bashqa dölet parlaméntlirighimu muhim ülge tiklep berdi,” déyilgen.

Aldinqi künlerde kanada parlaméntimu xitayning Uyghurlargha yürgüziwatqan zulumlirini “Irqiy qirghinchiliq” dep tonughan idi.