Хитай һөкүмити уйғур районида саяһәтчиликни зор күч билән тәрәққий қилдуруш йиғини чақирған

Вашингтондин мухбиримиз җәвлан тәйярлиди
2024.05.28

Хитай һөкүмити уйғур районида саяһәтчиликни зор күч билән тәрәққий қилдуруш йиғини чақирған

“ирқий қирғинчилиқ вә инсанийәткә қарши җинайәт өткүзүш” җинайити билән әйиблинип келиватқан хитайниң йеқинқи мәзгилдин буян уйғур районидики қәбиһ җинайәтлирини йошуруш вә “шинҗаң яхши җай” тәшвиқатини қанат яйдуруш үчүн саяһәтчиликни күчәп тәрәққий қилдуруватқанлиқи мәлум.

Хитайниң “тәңритағ тори”, “шинҗаң гезити” ториниң хәвәр қилишичә, уйғур аптоном районлуқ һөкүмәт27-май күни турпанда “2024-йиллиқ аптоном район саяһәтчиликини тәрәққий қилдуруш чоң йиғини” чақирған, йиғинға хитайниң ичи вә сиртидин болуп 500 адәм қатнашқан. Йиғинда аптоном районниң рәиси әркин туняз сөз қилип, “шинҗаңни дөләт ичи вә сиртидики саяһәтчиләр тәлпүнидиған гүзәл макан” ға айландуруш чақириқи елип барған.

Йиғинда, хитай мәдәнийәт вә саяһәт министирлиқи “шинҗаң яхши җай” саяһәтчилики мәхсус пиланини елан қилған болуп, униңда пул-муамилә органлири билән саяһәтчилик ширкәтлири бирлишип саяһәтчиләрни чақириш, саяһәт нуқтилирини көпәйтиш, баһада етибар бериш, мулазимәт түрини көпәйтиш, қатнаш шараитини яхшилаш, тәшвиқатни күчәйтиш қатарлиқ мәзмунлар орун алған.

Йеқиндин буян хитай даирилириниң чәт әллик саяһәтчиләрни уйғур райониға җәлп қилиш үчүн, түрлүк тәшвиқат һәрикәтлирини қанат яйдуруватқанлиқи, һәтта миңдин артуқ саяһәтчини елип кәлгән чәт әл саяһәт ширкәтлирини мукапатлайдиғанлиқини елан қилған иди. Уйғур районини йеқиндин көзитиватқан мутәхәссисләр, бу хитайниң барғансери чөкүватқан иқтисадини җанландуруш, шундақла уйғур районида йүргүзүватқан ирқий қирғинчилиқини пәрдазлаш вә “нормаллаштуруш” урунушиниң бир қисмидур, дәп қаримақта.

Бу йил 3-айда америка дөләт мәҗлиси әзалири вә кишилик һоқуқ саһәсидики мутәхәссисләр, хитай тәшвиқ қиливатқан “шинҗаң саяһәтчилики” ни “ирқий қирғинчилиқ саяһити” дәп атап, чәт әл саяһәт ширкәтлирини уйғур райониға саяһәт тәшкиллимәсликкә чақирғаниди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.