Узай булут: "коммунист хитай уйғур зиялийлирини ирқий қирғинчилиқ усулида бастуруватиду"

Мухбиримиз җәвлан
2021-07-05
Share

Хитайниң тәхминән 500 дин артуқ уйғур зиялийсини қамап, милләтниң сәркилири һесабланған бу кишиләрни өз хәлқидин айриветиши ирқий қирғинчилиқниң бир испати сүпитидә хәлқара җәмийәтниң диққитидә болуп кәлмәктә.

Түркийәлик мухбир, гетстон институтиниң алий тәтқиқатчиси узай булут 4-июл мәзкур институт тор бетидә мақалә елан қилип, хитай һөкүмитиниң уйғур зиялийлириға ирқий қирғинчилиқ усулида зиянкәшлик қиливатқанлиқини тәпсилий баян қилған. У бу мақалисидә уйғур қәләмкәшләр җәмийити вә башқа мәнбәләрдин игилигән мәлуматларға асасән, хитай һөкүмитиниң 2017-йилдин башлап 500 дин артуқ уйғур зиялийсини түрмә вә лагерларға қамиғанлиқини, бу зиялийларниң көпинчисиниң уйғур тили вә мәдәнийитигә төһпә қошуп келиватқан милләтсөйәр язғучи-шаирлар икәнликини алаһидә тилға алған.

У хәлқара илим саһәсидә актип паалийәт қилип, уйғурларни тонуштуруп кәлгән тәтқиқатчи раһилә давут, уйғурларниң мәниви һаятиға тәсири көрситип келиватқан шаир-язғучилардин абдуқадир җалалидин, әхтәм өмәр, һаҗи мирзаһид кирими (лагердин чиқип өлүп кәткән), адил тунияз, мәдәнийәт-маарип саһәсидә көзгә көрүнгән зиялий әхмәтҗан җүмә, абдуқадир җүмә (һәр икккиси әркин асия радийоси уйғур бөлүминиң муавин мудири мәмәтҗан җүмәниң иниси) қатарлиқларни хитай һөкүмити мәқсәтлик қарилап зиянкәшлик қилған зиялийлар қатарида көрситип өткән.

У мақалисиниң ахирида, хитай һөкүмити шунчә көп уйғурни вә уларниң зиялийлирини ирқий қирғинчилиқ усулида бастуруватқан һәм қийнаватқан әһвалда пүтүн дуняниң, болупму мусулманлар дунясиниң сүкүттә туруватқанлиқини қаттиқ әйиблигән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт