Amérika b d t 3-komitétining yighinida xitayning Uyghurlargha irqiy qirghinchiliq qiliwatqanliqini tenqid qildi

Muxbirimiz erkin
2021-10-05
Share

B d t ning 3-komitéti yeni "‍Ijti'ima'iy, insanperwerlik we medeniyet komitéti" ning 4-öktebir ötküzülgen yighinida, amérikaning b d t da turushluq bash elchisi linda tomas grénféld, xitayning Uyghurlargha qarita "Irqiy qirghinchiliq" we "Insanyetke qarshi jinayet" sadir qiliwatqanliqini tenqid qilghan. Grénféldning tekitlishiche, xitay kishilerning diqqitini "Shinjangda yüz bériwatqan irqiy qirghinchiliq we insanliqqa qarshi jinayettin bashqa yaqqa yötkeshke tirishmaqta" iken.

Grénféld xanim, amérikaning bir milyondin artuq Uyghur we az sanliq milletler tutup turush lagérlirida yétiwatqan shinjangdiki ehwallargha hergiz süküt qilmaydighanliqini éytqan. U mundaq dégen: "Xitayda, xitay xelq jumhuriyiti diqqetni shinjangda yüz bériwatqan irqiy qirghinchiliq we ‍insaniyetke qarshi jinayettin bashqa yaqqa burashqa urunmaqta. Biz bir milyondin artuq Uyghur we bashqa étnik hem diniy az sanliq milletler tutup turush lagérlirigha qamalghan ehwalda hergiz buninggha süküt qilmaymiz".

Yighinda yene gérmaniyening b d t da turushluq bash elchisi antiyé lindértismu söz qilip, Uyghur élidiki kishilik hoquq depsendichilikining éghir jawabkarliqqa tartilidighanliqini agahlandurghan. U, yawropa ittipaqining kishilik hoquq jaza méxanizmi maqullighanliqi, éghir kishilik hoquq depsendichiliki sadir qilghuchilarni jawabkarliqqa tartilidighanliqi bildürüp: "Bu da'iride xitaydiki bolupmu shinjangdiki kishilik hoquq weziyitige bolghan qattiq endishimizni ipadileymen" dégen.

Amérika we gérmaniye wekillirining sözi xitay wekilini qattiq bi'aram qilghan. Xitayning b d t turushluq bash elchisi jang jün yighinda diplomatik perdishepni qayrip qoyup, intayin qopal sözler bilem amérikagha hujum qilghan. U, ‍amérika bilen gérmaniyening barliq tenqidlirini ret qilip, ‍amérikaning öz tarixidiki xataliqlar bilen yüzlishishini, uning xitayni tenqidlesh salahiyiti yoqluqini ilgiri sürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet