Xitay hökümitining Uyghur déhqanlirigha "Qoyning ornigha éshekni almashturush" teshwiqati qiliwatqanliqi diqqet qozghidi

Muxbirimiz irade
2020-04-16
Élxet
Pikir
Share
Print

"Xitay xewerler tori" 16-aprél küni "Uyghur élining jenubidiki déhqanlar 'qoyni éshekke almashturush' arqiliq yuqiri örlidi" mawzuluq bir parche xewer élan qilghan.

Bu xewer chet'ellerdiki Uyghur közetküchilerning küchlük diqqitini qozghidi. Xewerde lopnur nahiyesi bostan kentide olturushluq nurgül abliz isimlik bir Uyghur ayal misal qilinip, jenubtiki déhqanlarning "Éshek süti sétip yuqiri turmush sewiyesige yétish" ke atlan'ghanliqidek bir bir idiye algha sürülgen.

Xewerde munular ilgiri sürülgen: "2016-Yili nurgül abliz bostan kentidiki yerlik hökümet bergen 11 namratliqtin qutuldurush qoyi we 50 namratliqtin qutuldurush keptirige érishken we ularni béqip namratliqtin qutulghan. U buning bilen toxtap qalmay, turmushning yuqiri sewiyesige yétish üchün béqiwatqan qoylirini sétiwétip, uning ornigha éshek alghan, ésheklerni béqip, ey qilip éshek süti sétip béyip ketken. Buning bilen kenttiki bashqilarmu nurgülni ülge qilghan. Qoylarning ornini éshekler igiligen, ular öz kenti we qoshna kentlerdin zakaz bergen kent ahalilirige éshek süti sétip bay bolghan."

Xitay hökümiti 2015-yilliridin tartip Uyghur élining jenubidiki yézilarda éshek béqish, éshek süti ishlepchiqirish heqqidiki teshwiqatni kücheytken idi. Islam dinida éshek göshi we éshek süti qatarliqlar "Haram" dep békitilgen bolushigha qarimay, xitayning Uyghurlar arisida hedep éshek sütining paydiliqliqini, éshek süti sétish arqiliq bay bolghili bolidighanliqini teshwiq qilishi küchlük naraziliq peyda qilghan.

Chet'ellerdiki Uyghur közetküchiler bu heqtiki munaziriliride xelq'arada éshek sütining paydiliq ikenlikige a'it héchqandaq bir ilmiy pakit yoq bolush bilen birge musulman Uyghur ammisigha "Qoyning ornigha éshekni almashturup yuqiri sewiyege yétish" ni teshwiq qilish "Xitayning yaman gherizini körsitip béridu," dégenlerni ilgiri sürmekte. Ularning qarishiche, bu xitay hökümitining Uyghurlargha yürgüzüwatqan "Medeniyet qirghinchiliqi" ning bir qismi hésablinidiken.

Toluq bet