Хитай даирилири ислам һәмкарлиқ тәшкилати әзалириға “шинҗаң яхши җай” тәшвиқати қилған

Мухбиримиз ирадә
2022-01-07
Share

“йәршари имамлар кеңиши” хитайниң уйғурларға қаритиватқан ирқий қирғинчилиқини әйибләп баянат елан қилғандин кейин хитай даирилири мусулман дөләтлиригә қарита йеңи бир нөвәтлик тәшвиқат һәрикитини башливәткән.

Хитайниң тәңритағ тори қатарлиқ һөкүмәт таратқулириниң хәвиридин қариғанда, -1айниң 5-күни, хитайниң ташқи ишлар министирлиқи, уйғур районлуқ һөкүмәт вә хитайниң сәуди әрәбистанида турушлуқ баш әлчиханиси бирликтә “шинҗаң яхши җай − ислам һәмкарлиқ тәшкилати вәкилләр өмикиниң шинҗаңни синтлиқ саяһәт қилиши” паалийити өткүзгән.

Сәуди әрәбистан, мисир, әрәб бирләшмә хәлипилики, пәләстин, пакистан, малайсия, һиндонезийә, қирғизистан, нигерийә, камерон қатарлиқ 36 дөләтниң ислам һәмкарлиқ тәшкилатида даимий турушлуқ вәкиллири, муавин вәкиллири вә ислам һәмкарлиқ тәшкилати катибат башқармисиниң әмәлдарлири қатарлиқлар қатнашқан бу тәшвиқат паалийитидә “шинҗаңниң аталмиш тәрәққияти”, уйғурларниң “хушал-хорам яшаватқанлиқи”, хитай һөкүмитиниң хитайдики “мусулманларниң бәхт-саадитигә йүксәк әһмийәт беридиғанлиқи” қатарлиқ мәзмунлар асас қилинған тәшвиқат филимлири қоюлған.

Хитай таратқулири бу һәқтики хәвиридә: “ислам һәмкарлиқ тәшкилати әзалири җуңгони қәтий қоллашни давамлаштуридиғанлиқини, пурсәт болса шинҗаңни йәнә бир қетим зиярәт қилишни үмид қилидиғанлиқлирини ипадиләшти” дегән.

Чәтәлләрдики уйғур көзәткүчиләр болса буни хитайниң “йәршари имамлар кеңиши” елан қилған чақириқтин җиддийләшкәнликиниң ипадиси, дәп қаримақта.

“йәршари имамлар кеңиши” барлиқ ислам мәзһәплири вә пикир еқимидики мусулман диний даһийларниң дунядики тунҗи вә әң чоң дөләт һалқиған һөкүмәтсиз оргини болуп, улар йеңи йил күни мәхсус бир баянат елан қилип барлиқ мусулманларни уйғурларға ирқий қирғинчилиқ қиливатқан хитай һакимийити орунлаштурған бейҗиң қишлиқ олимпик мусабиқисигә қатнишиштин мәни қилғаниди.

Мәзкур орган йәнә дуня уйғур қурултийи билән бирликтә “хәлқара ислам һәмкарлиқ тәшкилати” вә униңға әза дөләтләргә мәктуп йоллап уларни уйғур мәсилисидики сүкүтини бузушқа, бейҗиң олимпик мусабиқисини байқут қилишқа чақирған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт