Хитай американиң "шәрқий түркистан ислам һәрикити" ни "терорлуқ тәшкилатлар тизимлики" дин өчүрвәткәнликини әйиблигән

Мухбиримиз ирадә
2021-07-15
Share

Хитай һөкүмәт таратқулиридин "шинҗаң хәвәрләр тори" ниң хәвиригә қариғанда, хитай дөләтлик терорлуққа қарши туруш ишханисиниң муавин мудири, хитай җамаәт хәвипсизлики министирлиқи терорлуққа қарши туруш идарисиниң муавин башлиқи ву шин 14-июл күни җамаәт хәвпсзлик министирлиқиниң мухбирларни күтүвелиш йиғинида американиң "шәрқий түркистан ислам һәрикити" тәшкилатини "терорлуқ тәшкилатлар тизимлики" дин өчүрүветишигә инкас қайтурған.

У бу һәқтики баянатида мундақ дегән: "американиң мунасивәтлик сиясионлириниң ‹шәрқий түркистан ислам һәрикити' тәшкилатини ‹терорлуқ тәшкилатлар тизимлики' дин чиқириветиши, американиң терорлуққа қарши туруш мәсилисини ‹сиясийлаштуруватқанлиқи' вә уни ‹козерлаштуруватқанлиқи' ниң бир ипадиси. Американиң мәқсити ‹шинҗаң мәсилиси' ни көтүрүп чиқип, бу арқилиқ җуңгони қамал қилиштур."

Америка һөкүмити 2020-йили 20-өктәбир күни сабиқ ташқий ишлар министири майк помпейониң имзаси билән "‹шәрқий түркистан ислам һәрикити' тәшкилатиниң һәқиқәтән мәвҗутлуқи вә униң актип паалийәт қиливатқанлиқиға даир йеـтәрлик дәлил-испатларниң болмиғанлиқи" сәвәблик уни "терорлуқ тәшкилатлар тизимлики" дин өчүрүп ташлиғанлиқини җакарлиған иди.

Хитай даирилириниң немә үчүн бу мәсилини қайта көтүрүп чиққанлиқи ениқ әмәс, бирақ ву шин шу күндики сөзидә "‹шәрқий түркистан ислам һәрикити' тәшкилати хитайниң бихәтәрликигә тәһдит пәйда қиливатқан терорлуқ тәшкилатлириниң бири. Бу тәшкилат қурулғандин буян йүзлигән зораванлиқ вә терорлуқ вәқәлирини садир қилди. ‹Шәрқий түркистан ислам һәрикити' тәшкилати дөләт һалқиған терорлуқ паалийәтлирини елип баралайдиған хәлқаралиқ терорлуқ тәшкилати болуп, у хитай вә алақидар дөләтләрниң бихәтәрлики һәм муқимлиқиға еғир тәһдит пәйда қилиду," дегән.

Һалбуки, чәт әлләрдики мутәхәссисиләр хитай һөкүмитиниң узун йиллардин буян мәвҗутлуқи гуман қозғап кәлгән кәлгән бу тәшкилатниң намини сүйистемал қилип, уйғурларға қаритиватқан зор көләмлик бастуруш вә зиянкәшликлирини ақлап кәлгәнликини, америка һөкүмитиниң аталмиш бу тәшкилатни "терорлуқ тәшкилатлар тизимлики" өчүрүветиши билән хитайниң "терролуқ" ни баһанә қилип өзини ақлайдиған асаслириниң битчит болғанлиқини тәкитлимәктә.

Хитай даирилири гәрчә "шәрқий түркистан ислам һәрикити" тәшкилатиниң исмини қайта көтүрүп чиққан болсиму, бирақ афғанистан даирилириниң йеқинда афғанистанда 10 нәпәр хитай җасусини қолға чүшүрүши билән хитайниң бу оюниға болған гуман техиму күчәйгән. Бу һәқтики хәвәрдә афғанистанда қолға чүшкән бу хитай җасуслири ичидә икки нәпириниң талибанға тәвә террорлуқ тәшкилати "һәққанийәт тори" билән мунасивити барлиқини, бу 10 нәпәр хитай җасуслириниң афғанистанда "шәрқий түркистан ислам һәрикити" дин бу сахта тәшкилатни пәйда қилмақчи болғанлиқи билдүрүлгән иди.

Сиясий анализчилар америка һөкүмити исми бар, җисми йоқ "шәрқий түркистан ислам һәрикити" тәшкилатини "террорлуқ тәшкилатлар тизимлики" дин чиқиривәткәндин кейин, буниңға чидимиған хитай мәзкур тәшкилатниң техичә мәвҗутлуқини испатлап, уйғурларни "террорчи" қилип көрситиш үчүн бу җасусларни ишқа салған болуши мумкинликини тәхмин қилмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт