‍Isra'iliyening “Xaretiz” gézitide isra'iliye hökümiti béyjing qishliq ‍olimpikini bayqut qilishqa chaqirildi

Muxbirimiz erkin
2021-12-27
Share

Isra'iliyening nopuzluq gézitliridin “Xaretiz” géziti 27-dékabir maqale élan qilip, ‍isra'iliye hökümitini xitayning béyjing qishliq olimpikini bayqut qilishqa chaqirilghan. Maqalide, natsistlar gérmaniyesining 1936-yilidiki bérlin olimpiki bilen xitayning 2022-yilliq béyjing qishliq olimpiki sélishturulup؛ “Tarix, yehudiy chong qirghinchiliqi insanliqqa we Uyghurlargha hemdemde bolup, xitayning zulumgha qarshi béyjing qishliq olimpikini diplomatik bayqut qilishni telep qiliwatqan bir peytte, isra'iliye perwasiz qalamdu?” déyilgen.

“Isra'iliye néme üchün béyjingning irqiy qirghinchiliq musabiqisini bayqut qilishi kérek?” mawzuluq bu maqalini “Uyghur herikiti teshkilati” re'isi roshen abbas bilen amérikada yashaydighan yehudiy chong qirghinchiliqi shahiti sami stégman birliship qelemge alghan. Maqalide: “Buning irqiy qirghinchiliq jinayitini ashkara aqlawatqan bir hakimiyet teripidin élip bériliwatqanliqi”, “Emeliyette, bu hakimiyetning Uyghur ayallirini pilanliq mejburiy tughmas qilip, ularni ‛‍ashqunluqning bala tughush mashinisi bolushtin azad qilduq‚, dep tebrikligenliki” tekitlen'gen.

Maqalide yene: “Yehudiy chong qirghinchiliqining irqiy qirghinchiliqqa melum bir guruppa yalghuz berdashliq bérelmeydighanliqini körsetkenliki'i”, biraq “Insaliqning barliq insaniyetke ortaq ikenlikini étirap qilish héchqandaq bir guruppining asasi insanliq qedir-qimmitige layiq emes, dep qaralmasliqini telep qilish dunyagha baghliq bolup qalghanliqi” bildürülgen. Maqalide éytilishiche, nöwette bu sawaq sherqiy türkistanda sinaqqa duch kelgen. Maqalide, gitlérning 1936-yili bérlin olimpikide dunyagha özining küchi we irqchi heywisini körsitish arqiliq natsistlar hökümitini qanunlashturghanliqi eskertilip: “Bügün biz isra'iliye we bashqa döletlerni bu xataliqtin sawaq élishqa we (olimpikqa) qatnishishni ret qilishqa chaqirimiz” déyilgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet