Istanbuldiki reyna kéchilik kulubini qan'gha boyighan térrorchining kimliki heqqidiki türlük oxshimighan uchurlar ghulghula qozghimaqta

Istanbuldiki reyna kéchilik kulubida yüz bergen térrorluq hujumi bügün 7-künige qedem qoyghan bolsimu, emma térrorchining téxiche tutulmasliqi we kimlikining jezimleshtürülmesliki ijtima'iy taratqularda küchlük ghulghula qozghimaqta.

Bolupmu türkiye hökümet we saqchi terepning térrorchining kimliki heqqidiki bir-birige oxshimighan bayanatliri shundaqla türkiye taratquliridiki ziddiyetlik xewerler awam arisida pikir qalaymiqanchiliqi peyda qilmaqta.

Ötken bir hepte dawamida türkiye taratquliri térrorchining daghistanliq musulman, orta asiyaliq qazaq, özbek, qirghiz yaki tajik we yaki süriyediki urushtin qaytqan Uyghur bolush éhtimalliqliri heqqide türlük xewerlerni tarqatti. Bolupmu 5-yanwar küni türkiyening mu'awin bash ministéri weyis qaynaqning “Térrorchining Uyghur bolush éhtimali yoqiri” dep bayanat bérishi bilen türkiye we dunyawiy taratqularda reyna kulubini qan'gha boyighan térrorchining Uyghur ikenliki heqqide arqa-arqidin xewerler bérildi. Bu hal muhajirettiki Uyghurlar, bolupmu türkiyediki Uyghurlar arisida qattiq bi'aramliq we epsusluq keypiyati peyda qildi.

Halbuki, bügün, yeni 7-yanwar küni türkiyediki “Hürriyet” we “Milliyet” gézitliri istanbul emniyet mudirliqi teminligen eng yéngi uchurgha asasen térrorchining abdulqadir masharipof isimlik özbek ikenliki heqqide xewer bergen. Xewerde térrorchining “Ebu muhemmed xurasani” dégen kod isimni qollan'ghanliqi bildürülgen.

Türkiye saqchi terep bilen taratqulardiki bir-birige oxshimaydighan bayanlar türkiyede istiqamet qiliwatqan qérindash türk jama'etlirini bi'aram qilghan. 6-Yanwar küni istanbulning zeytunburnu rayonidiki qérindash türk teshkilatliri bilen wexpilirining wekilliri istanbul emniyet mudirliqigha yighilip taratqulardiki pakitsiz qaratmiliq we mes'uliyetsizlikke qarshi naraziliq bildürgen.