Хитай җәмийитидә ит гөши байримидин хиҗил болуш аламити байқалған

Хәлқара ахбарат васитилириниң хәвәр қилишичә, һайванатлар һоқуқи паалийәтчилириниң тәнқид вә тәшәббуслириға қаримай, хитайниң гуаңши өлкисиниң йүлин шәһиридә йилда бир өткүзүлидиған ит гөши байрими бу йилму башланған, әмма дағдуғиси йиллардикидин нисбәтән төвән болған.

Ройтерсниң бу һәқтики хәвиридә билдүрүлүшичә, гәрчә 21 ‏-июн күни ит гөши байрими рәсмий башланған болсиму, йүлиндики көпинчә ашханиларда ит гөши көрүлмигән. Йүлин шәһәрлик һөкүмәт ит гөши байримини һөкүмәт сүпитидә қоллимайдиғанлиқини, әмма байрам өткүзгүчиләрни чәклимәйдиғанлиқини билдүргән.

Шинхуа агентлиқи өткән һәптә бу байрам һәққидә бир рай синаш елип барған, нәтиҗидә 64% аваз мәзкур байрамни мәңгүлүк әмәлдин қалдурушқа қетилған.

Б б с ниң хәвиридә баян қилинишичә, хитайдики бир һайванатларни қоғдаш җәмийитиниң башлиқи: “дуня ит гөши байримини хитай мәдәнийитиниң бир парчиси дәп чүшинип қеливатиду, әмәлийәттә ундақ әмәс” дегән вә өзиниң бундақ чүшинилиштин хиҗил болидиғанлиқини билдүргән.

Әмма ройтерсниң зияритини қобул қилған җу фамилилик бир тиҗарәтчи өзи билидиған көпинчә кишиләрниң ит гөшини яхши көридиғанлиқини вә униңдин алдирап ваз кечәлмәйдиғанлиқини билдүргән.

Хитайниң бу қетимқи ит гөши байрими башлиништин аввал дунядики һайван һәқлирини қоғдаш җәмийәтлири 11 милйон кишилик имза топлап бейҗиң даирилирини мәзкур байрамни әмәлдин қалдурушқа дәвәт қилған иди.