Uyghur edebiyatigha béghishlan'ghan uniwérsal edebiy zhurnal - "Iz" ning tunji sani yoruq kördi

Muxbirimiz qutlan
2017-08-27
Élxet
Pikir
Share
Print

Muhajirettiki Uyghur bilim ademlirining tirishchanliqi arqisida Uyghur edebiyatigha béghishlan'ghan uniwérsal edebiy zhurnal - "Iz" ning tunji sani yéqinda istanbulda yoruq kördi.

Mezkur zhurnal istanbuldiki Uyghur bilim ademliridin murat orxunning sahibliqida chiqirilghan bolup, muyesser abdul'exet xendan bash muherrirlikni, muhajirettiki Uyghur ziyaliyliridin 15 kishi tehrir hey'etlikini üstige alghan.

Mezkur edebiy zhurnalning birinchi béti abdurehim ötkürning "Iz" namliq shé'iri bilen bashlan'ghan bolup, uningda abdurehim ötkür xatirisige, balilargha atap, hékayiler baghchisi, shé'iriyet gülzari, bilim we tetqiqat, edebiy uchurlar qatarliq mexsus sehipiler échilghan.

"Iz" zhurnilining tunji sanida Uyghur diyaridiki yazghuchi-sha'irlarning yéqinqi nadir ijadiyetliridin örnekler bérilgen bolup, uningda yene muhajirettiki Uyghur qelemkeshlirining edebiy we ilmiy eserlirimu orun alghan.

Zhurnal tehrir bölümining "Iz" zhurnili heqqide bergen tehrir ilawiside mundaq déyilgen: "Mezkur zhurnal Uyghur edebiyatini öz ichige alghan dunya edebiyatidiki klassik we nadir eserlerni oqurmenlerge teqdim qilish, Uyghur tilida ijadiyet bilen shughullinidighan kesip igiliri we heweskarlarning eserlirini élan qilish, Uyghur edebiyati we edebiy tilini bashqa türk milletlirige tonushturush shundaqla Uyghur tilidiki bir zhurnalni mezmun we süpet jehettin tereqqiy qildurup, xelq'aradiki süpetlik edebiy zhurnallarning sewiyesige yetküzüshni meqset qilghan pesillik edebiy zhurnaldur."

Toluq bet