Түркийәдә җасуслуқ җинайити билән тутулған алтә гумандарниң қилмишлири ашкариланди

Вашингтондин мухбиримиз җәвлан тәйярлиди
2024.02.28

Истанбул җумһурийәт баш тәптишлики 20-феврал күни башлиған һәрикәттә, хитайға җасуслуқ қилиш билән әйиблинип тутқун қилинған алтә гумандарниң қилмишлири ашкариланған.

“хәвәр түрк” телевизийәси 28-феврал күни елан қилған хәвәргә қариғанда, хитайға җасуслуқ қилған бу алтә гумандардин садиқ мәмәтәзизниң хитай дөләт хәвпсизлики идарисиниң хадими, қағилиқ наһийәлик парткомниң муавин секретари “ли” билән көрүшкәнлики, әслидә униң 2000-йиллардин башлапла хитай сақчи даирилири җасуслиридин “мутивулла” вә “алимҗан” исимлик җасуслар билән телефонда алақилишип турғанлиқи ашкариланған һәмдә истанбул баш тәптишликигә йолланған доклатта қәйт қилинған.

Түркийә истихбаратиниң дәлиллишигә көрә, садиқ мәмәтәзиз хитай җасуслири билән йүз туранә көрүшүш үчүн 2023-йил хоңкоңға, арқидин қәшқәр қағилиқ наһийәсигә барған. У йәрдә “ли” фамилилик җасус вә “алимҗан” билән көрүшкән. Униңдин кейин, сәуди әрәбистаниниң җиддә шәһиридә “алимҗан” билән қайта көрүшкән; һәр қетим көрүшкәндә, шәрқий түркистан тәшкилатлириниң йиғинлири, түркийәдә тонулған сиясий паалийәтчиләр вә җамаәт әрбаблириниң туралғу җайи вә иш-паалийәтлири һәққидә топлиған учурлирини тәминлигән. У йәнә хитай җасуслуқ органлириниң буйруқи билән, түркийәдики җамаәт әрбаби абдуқадир япчан билән йеқин олтуруш үчүн 2023-йил 1-айда башақшәһәрдин өй издигән. Зәйтинбурнуда навайлиқ қиливатқан абдуллани сүрийәдики уйғурлар һәққидә учур топлашқа салған. У юқириқи җасуслуқ паалийәтлири үчүн хитайдин җәмий 22 миң доллар пул алған.

Гумандарлардин һәбибулла үрүмчи, “алимҗан” дин алған пулни садиқ мәмәтәзизгә йәткүзүп бериштә васитичилик қилған. Униңдин башқа, гумандарлардин һашим сабитоғли умрә һәҗ қилиш баһанисидә сәуди әрәбистанға берип, хитайдин алған пулни “тиҗарәт” нами билән садиқ мәмәтәзизгә бәргән. Гумандарлардин абдулла насир бурсадики бир меһманханида “шө гаңҗуң” исимлик бир хитай җасуси билән көп қетим көрүшкән.

Нөвәттә бу дело йәнә давамлиқ тәкшүрүп дәлилләш басқучида икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.