Хитай чәтәлләрдики уйғурларни җасуслуққа үндәшни давам қилмақта

Мухбиримиз әзиз
2018-11-13
Елхәт
Пикир
Share
Принт

Йиллардин буян хитай һөкүмитиниң чәтәлләрдики уйғур җамаитигә телефон уруш яки учур йоллаш арқилиқ уларни өзлири үчүн «көз-қулақ» болуп беришкә дәвәт қилип келиватқанлиқи һәққидә хәвәрләр оттуриға чиқип кәлмәктә. Йеқинда хитай һөкүмитиниң бу усулни қайтидин базарға салғанлиқи ашкара болмақта.

«Шиветсийә радийоси» ниң 9-ноябирдики хәвиридә ейтилишичә, хитай дөләт бихәтәрлик органлириниң бир қисим хадимлири шиветсийәдики уйғурларға телефон бериш вә елхәт йоллаш арқилиқ бир қисим кишиләрни өзлири үчүн җасуслуқ қилип беришкә дәвәт қилған. Шуниңдәк шиветсийәдики вә башқа җайлардики уйғурларниң алақидар учурлирини топлап беришкә буйруған.

Әнглийәдә чиқидиған «мустәқиллиқ» гезитиниң 12-ноябир санидики мәхсус мақалида ейтилишичә, хитай һөкүмити түркийәдики бир қисим уйғурларни өзлири үчүн җасуслуқ қилишқа қизиқтурмақчи болған. Шулардин бири болған әйса исимлик бир яш буни рәт қилғанда хитай сақчилири «сәнғу түркийәдә өзүңни сақ-саламәт дәп ойлишиң мумкин. Әмма бу җайдики қериндашлириң вә башқа туғқанлириңни қандақ қилисән?» дәп қорқутқан. Шундақла «сән қәйәргә кәтсәңму биз сени тапалаймиз» дәп һәйвә қилған.

Уйғурлар мәсилиси бойичә издиниватқан мутәхәссисләрдин руний стенберг хитай һөкүмитиниң бу қилмишидики асасий мәқсәтниң немә болуши һәққидә сөз қилип: «уларниң нишани муһаҗирәттики уйғурларға бесим пәйда қилиш, шу арқилиқ уларни парчилаш вә уйғурлар арисиға гуман уруқи териш» дәп көрсәткән.

Пикирләр (0)
Share
Толуқ бәт