Мустафа ақсу колорадо университетида хитайниң җаза лагерлирини тонуштурди

Мухбиримиз әркин
2020-03-09
Елхәт
Пикир
Share
Принт

Америкадики «уйғур кишилик һоқуқ қурулуши» тәшкилатиниң тәтқиқатчиси мустафа ақсу өткән һәптә америкиниң колорада университетида доклат берип, хитайниң уйғур җаза лагерлирини тонуштурған.

Колорадо университетидики «мустәқиллиқ» гезитиниң хәвәр қилишичә, мустафа ақсу 6‏-март күни өткүзүлгән бу йиғинда, «кишиләр ‹җаза лагерлири' дегән сөзни йәһудий чоң қирғинчилиқи билән бағлашқа майил болсиму, лекин бу лагерларниң һазирму мәвҗут» икәнликини билдүргән. Хәвәрдә, чоң қирғинчилиқтин кейин йәһудийлар «һәргиз қайтиланмайду» дегән һәрикәт қозғап, кишиләрни җаза лагерлиридики вәһшийликләр, аз санлиқ милләтләрни җазалаш, хорлашниң алдини елиш һәққидә агаһландурған болсиму, лекин хитай һөкүмитиниң уйғурларни өйлиридин қоғлап чиқириши вә әмгәк лагерлириға зорлишидәк кишилик һоқуқ дәпсәндичиликигә даир хәвәрләр дуняни қаплиғанлиқи тәкитләнгән.

Хәвәрдә қәйт қилинишичә, йиғинда мустафа ақсу «һәргиз қайтиланмайду, дегәнниң һазир қайта йүз бериватқанлиқи» ни әскәртип, хитайдики бу вәзийәт сәвәблик униң аилисиниң өзи билән чәк-чегра аҗратқанлиқини чүшәндүргән. У, хитай һөкүмитиниң дөләт ичи вә сиртидики уйғурларниң санлиқ учурини топлап, кишиләрни «ишәнчлик адәм», «тәһдит» яки «хәтәрлик адәм» дәп дәриҗигә айриғанлиқи, у лагерларни «қайта тәрбийәләш мәркәзлири» дәп тәриплисиму, лекин униңдики кишиләрниң җинси таҗавузчилиққа, ач қалдурушқа, йүзигә чирағ йеқип ухлашқа мәҗбурланғанлиқи һәққидә шаһитларниң гуваһлиқ бәргәнликини билдүргән. Йиғинниң ахирда, колорадо университетиниң хитайда узун йил «етнографийәлик» тәкшүрүш елип барған оқуғучиси сараһ тинән тиңшиғучиларға уларниң бу һәқтики бир илтимасқа имза қоюп, уйғурларға ярдәм қилалайдиғанлиқини тәкитлигән.

Пикирләр (0)
Share
Толуқ бәт