Amérika armiyesi jenubiy déngizda bashquridighan bomba qoyup bérip, xitaygha agahlandurush bergen

Amérika tinch okyan 7-filotining bir hujumchi paraxoti jenubiy déngizning filippin tewelikidiki rayonda ötküzülgen rast oq étish meshiqide bir bashqurulidighan bomba qoyup bergen.

Analizchilar bu xitayning igilik hoquqi ixtilaptiki mezkur rayonda élip bériwatqan herbiy herikitige bérilgen küchlük signal, dep körsetmekte.

Amérika déngiz armiyesining herbiy meshiqi xitayning bu rayondiki herbiy herikiti kücheygen shundaqla xitayning wuxende partlighan korona wirusi amerika-xitay munasiwetlirini jiddiyleshtürüwetken mezgilge toghra kelgen idi. Amérika tinch okyan armiyisining 7-filoti 23-mart küni élan qilghan féysbuktiki uchurida “USS Barriy” namliq hujumchi paraxotning filippin déngizda ötküzülgen rast oq étish herbiy meshiqide bir bashqurulidighan bomba qoyup bergenlikini bildürgen.

Uchurda “USS Barriy” ning hindi-tinch okyan rayonidiki bixeterlik we muqimliqni qoghdash herikitige qatniship, 7-filotning qomandanliqi astidiki eng chong hujumchi paraxot iskadroni bolghan 15-iskandron'gha ishtirak qilghanliqi tekitlen'gen. Lékin uchurda bashqurulidighan bombining qoyup bérilgen konkrét orni, waqti, musapisi qatarliq tepsilatlar tilgha élinmighan.

Buning bir hepte aldida xitayning “Yer shari waqti géziti” bir xitay herbiy mutexessisining sözini neqil keltürüp, xitayning bu rayondiki amérika herbiy paraxotlirigha éliktromagnétik we lazér nurluq qorallarni ishlitishi kéreklikini ilgiri sürgen idi. Melum bolushiche, nöwette jenubi déngizdiki meshiqqe amérikaning “Te’odor Rozwélt” we “USS Amérika”, namliq ikki awiyamatka jeng guruppisi qatnashmaqta iken.