Хәлқаралиқ сот җәнубий деңиз шикайитигә қарап чиқти, хитай сотни байқут қилди

Мухбиримиз җүмә
2016-07-06
Share

Чаршәнбә күни гаага шәһиригә җайлашқан хәлқаралиқ сот филиппин һөкүмити хитай үстидин сунған су тәвәлики шикайитигә қарап чиқти, әмма хитай тәрәп мәзкур сотни байқут қилди.

Мәзкур сот һәққидә дүшәнбә күни баянат бәргән хитай ташқи ишлар баянатчиси хоң лей хәлқара “сот һөкүминиң инавәтсиз вә қанунсиз” икәнликини, уларниң“ җәнубий деңиз мәсилисигә арилишиш һоқуқи йоқ” лиқини билдүргән иди.

Ню-йорк вақит гезитиниң хәвәр қилишичә, сот һөкүми келәр һәптә елан қилинидиған болуп, һөкүм хитай даирилирини җиддийләштүрүшкә башлиған.

Бу һәқтики мулаһизиләргә қариғанда, хитайниң сәйшәнбә күни җәнубий деңизниң талаш-тартиштики парасел арилиға йеқин җайда башлиған һәрбий маневири шу хилдики җиддийлишишкә мунасивәтлик бир хил күч көрситиш һәрикити болуп һесаблинидикән.

Мәлум болушичә, хәлқара сотниң нәтиҗиси келәр сәйшәнбә күни елан қилинидиған болуп, хитай җәнубий деңизда башлиған һәрбий маневир келәр дүшәнбә күнигичә давам қилидикән.

Хитай йеқинқи йиллардин буян җәнубий деңизиңниң мутләқ коп қисимни “өзиниң” дәп елан қилип, деңизға тутишидиған филиппин, бируней, малайсия вә вийетнам қатарлиқ дөләтләрниң наразилиқини қозғиған.

Хитай йәнә спрател вә парасел тақим араллири тәвәсигә бир қисим сүний аралларни ясиған һәмдә вудй арилиға радар вә йәрдин һаваға қоюп берилидиған башқурулидиған бомба орунлаштурған иди.

Бу америка даирилириниң диққитини қозғиған. Америка хитайни мәзкур районни һәрбийләштүрмәсликкә чақирған вә аралларниң игилик һоқуқини етирап қилмайдиғанлиқини билдүргән.

Америка шу мунасивәт билән кичик типтики уруш парахотлирини хитай ясиған сүний аралларға йеқин җайдин бир нәччә қетим өткүзгән иди.

Хитай чаршәнбә күни һөкүмәт авази болған “хәлқ гезити” дә баш мақалә елан қилип, америкини җәнубий деңиз мәсилисидин йирақ турушқа агаһландурди.

Мақалидә “әгәр америка җәнубий деңиз мәсилисидин йирақ турмайдикән буниң икки тәрәп мунасивәтлиригә дахили йәткүзидиғанлиқи” көрситилди. Һалбуки, америкиниң буниңға қандақ инкас қайтурғанлиқи һазирчә намәлум.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт