Америка тинч окяндики иттипақдашлирини җәнубий деңиздики һәрбий күчини күчәйтишкә чақирди

Мухбиримиз әркин
2018-12-28
Елхәт
Пикир
Share
Принт

Америка дөләт мудапиә министирлиқи униң тинч окяндики иттипақдашлирини җәнубий деңиздики һәрбий күчини күчәйтип, хитайға тақабил турушқа чақирған.

Бу чақириқни америка дөләт мудапиә министирлиқиниң асия-тинч окян ишлириға мәсул ярдәмчи министири рәндий шрайвер «австралийә» гезитиниң зияритини қобул қилғанда тәкитлигән.

Рәндий шрайвер «мениңчә хитайға техиму йошурун бесим пәйда қилишниң йоли шериклиримиз вә иттипақдашлиримизниң бу райондики бирләшмә һәрикәтләргә иштирак қилишидур. . . . Улар деңиз қатнаш әркинликини қоғдаш мәшғулатлириға қатнишалмисиму, лекин уларниң бирләшмә чарлаш вә ортақ һәрикәткә тәйяр турушидур» дегән.

Хитайниң җәнубий тинч окяндики арал дөләтлириниң ул әслиһәлирини мәбләғ билән тәминләш, йәрлик сиясәтчиләргә пул ианә қилиш қатарлиқ һәрикәтлири австралийә вә йеңи зеландийәниң диққитини қозғап кәлгән иди.

Рәндий шрайвер «австралийә» гезитигә қилған сөзидә, хитайниң җәнубий тинч окянда һәрбий база қуруш пилани бар болуши мумкинликини агаһландурған. Америкиниң җәнубий деңиздики әркин деңиз қатнишини қоғдаш һәрикити хитайниң бу райондики земин тәлипи вә һәрбий әслиһәлиригә хирис қилип, бәзидә икки тәрәп һәрбий парахотлириниң өз ара тиркишиш вәқәлирини пәйда қилип кәлди.

Бу йил 8‏-айда хитайниң уруш парахоти сипратил тақим араллириниң әтрапида америкиниң «декотер» намлиқ уруш парахотиға соқулуп кетишкә тасла қалған иди.

Рәндий шрайвер «австралийә» гезитигә йәнә америкиниң әнглийә, фирансийә, канада қатарлиқ иттипақдашлириниң җәнубий деңиздики һәрбий паалийитини күчәйткәнликини билдүрүп, чүнки улар «җәнубий деңизда хәлқара қанун вә өлчәмләргә хилаплиқ қилишниң йәр шари тәсирини тонуп йәтмәктә» дегән.

Австралийә билән йеңи зеландийә йеқиндин бери хитайға болған сәзгүрлүкини күчәйткән. Һәр икки дөләт хитайниң хуавей ширкитиниң 5G интернет қурулушиға иштирак қилишини чәклигән иди.

Пикирләр (0)
Share
Толуқ бәт