Jenwediki “Soda we kishilik hoquq munbiri” yighinida Uyghur mejburiy emgiki mesilisi otturigha qoyuldi

Birleshken döletler teshkilati “Soda we kishilik hoquq munbiri” ning 12-qétimliq yighini 27-noyabir küni jenwede bashlan'ghan. Uyghurlarning mejburiy emgek mesilisige diqqet tartidighan bu muhim sorun'gha dunya Uyghur qurultiyi, Uyghur herikiti teshkilati, Uyghur kishilik hoquq qurulushi, Uyghur amérika birleshmisining wekilliri qatnashqan.

Amérika Uyghur birleshmisining re'isi elfidar iltebir “B d t soda we kishilik hoquq munbiri” yighinining so'al-jawab qismida hökümetsiz teshkilatlar qatarida söz élip, “Küntaxta we tokluq aptomobildin ibaret dunyadiki eng muhim ikki sahening teminlesh zenjirliride mejburiy emgekke séliniwatqan Uyghurlar mesilisining bügünki yighinda otturigha qoyulmighanliqi” ni tenqid qilghan. U sözligüchilerdin bu sahediki Uyghur mejburiy emgikini ayaghlashturush üchün qandaq pilanlirining barliqini bilishni xalaydighanliqini éytqan.

Birleshken döletler teshkilatining “Soda we kishilik hoquq munbiri” hökümetler, soda sahesi, jem'iyet we ijtima'iy qurulushlar, adwokatlar, meblegh salghuchilar, b d t apparatliri, kishilik hoquq organliri, ishchilar uyushmiliri, ilmiy tetqiqatchilar we axbarat wasitilirining wekillirini bir arigha jem qilidighan muhim we eng chong soda we kishilik hoquq yighilishi bolup hésablinidu.

Uyghur teshkilatlirining wekilliri 27-noyabirdin 29-noyabirghiche dawam qilidighan bu yighinda Uyghur mejburiy emgiki mesilisini küntertipke qoyush üchün soda we siyaset sahesidiki alaqidar shexsler bilen bir qatar uchrishishlarni ötküzidiken.