Хитай хәлқ қурултийиниң вәкили қурбан нияз “җуңхуа мәдәнийити” ни чоңқур йилтиз тартқузушниң шәрәплик вәзипә икәнликини билдүргән

Мухбиримиз җәвлан
2022-03-04
Share

Хитай рәиси ши җинпиң аталмиш “җуңхуа милләтлириниң ортақ бир гәвдиси” ни мустәһкәмләп, хитайдики мәдәнийәтләрниң өзара юғурулушини тезлитип, аз санлиқ милләт пуқралири, шундақла яш-өсмүрләрни “җуңхуа милләтлири бир аилә” дегән аң бойичә тәрбийәләп, “җуңхуа миллити” еңини кишиләрниң қәлбигә чоңқур сиңдүрүшни тәкитләп кәлгәниди.

Йеқинда хитайниң “тәңритағ тори” қатарлиқ тәшвиқат васитилиридә хитай хәлқ қурултийиниң вәкили болуп сайланған қурбан ниязниң “җуңхуа мәдәнийитини маарип билән сиңдүрүштики илғар иш-излири” вә “қиммәтлик тәҗрибилири” алаһидә хәвәр қилинған. Қурбан нияз 2003-йил ақсу учтурпан наһийәси имамлирим базирида “дөләт тили мәктипи” қурғандин башлап һазирғичә хитай тили вә мәдәнийитини уйғур балилириға сиңдүрүштә вә авамға тәрбийә бериштә сәпниң алдида маңған актиплардин болуп, хитай һөкүмитиниң көп қетим тәқдирлишигә еришкән.

Хәвәрдә ейтилишичә, қурбан нияз ақсу тәвәсидила әмәс қәшқәр, хотән, ташқорған қатарлиқ җайлардиму көп қетим “җуңхуа мәдәнийити” ни тонуштуруп лексийә сөзлигән; хәлқниң барғанчә хитайчә сөзләйдиған, чағанда җувава түгидиған, ишиккә хитайчә мәснәви чаплайдиған болуп кәткинидин пәхирлинидиғанлиқини ейтқан қурбан нияз, уларни “илғар мәдәнийәт билән озуқландуруш” ниң мүшкүл, әмма шәрәплик вәзипә икәнликини билдүргән.

Хитайчини вә хитай мәдәнийитини уйғур дияриға “чоңқур йилтиз тартқузуш” та чоң нәтиҗә қазинип, хитай хәлқ қурултийиниң вәкили болған қурбан нияз йәнә 2022-йил бейҗиң қишлиқ олимпик мусабиқисиниң мәшилини көтүргән. Йеқинда у хитай хәлқ қурултийиниң бейҗиңда өткүзүлгән йиғиниға барғанда мухбирларға өз тәҗрибилирини сөзлигән болуп, еришкән нәтиҗилири билән биргә йәнә оқуғучиларға дәрс өтүшниң тәслики, оқуғучи қобул қилишниң тәслики, ата-аниларниң буниң әһмийитини чүшәнмәйватқанлиқи дегәндәк қийинчилиқларни тилға алған.

Тәһлилчиләрниң қаришичә, өз мәдәнийитини “җуңхуа мәдәнийити” дегән нам билән уйғурларға теңиватқан хитай һөкүмити ишни аввал маариптин вә бу саһәдики қурбан нияздәк актиплардин башлиған болуп, авам хәлқни балилиридин башлап хитайчә сөзләйдиған вә хитай мәдәнийити бойичә яшайдиған қилиш үчүн һәссиләп күч сәрп қилмақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт