Хитай һөкүмити уйғур районидики бәзи наһийәләрдә "җуңхуа мәдәнийәт базиси" қурушни башлиған

Мухбиримиз җәвлан
2021-05-19
Share

Хитай таратқулиридин мәлум болушичә, хитай һөкүмити "җуңхуа мәдәнийитини һәр җайда омумлаштуруш" пилани бойичә уйғур аптоном районидики бәзи наһийәләрдә қоюқ хитай мәдәнийити түсини алған "җуңхуа мәдәнийәт базиси" қурулушини башлиған.

Хитай һөкүмити 600 милйон йүән аҗритип, қарашәһәр наһийәсидә "қәдимий йолдики ривайәт" темисида "ғәрбкә саяһәт базири" қурушни пиланлиған болуп, омумий көлими 300 мо, қурулуш көлими 200 миң кувадрат метир келидикән. Қурулуш мәсулиниң тонуштурушичә, бу базарға тәқлидий шәкилдики қәдимий қурулушлар, музейлар вә йәнә көплигән тәрбийәләш орунлири селинип, "җуңхуа әнәниви мәдәнийити" тәшвиқати елип берилидикән.

Униңдин башқа, учтурпан наһийәси имамлирим базири "аптоном районлуқ җуңхуа мәдәнийити сәйнаси көргәзмә орни" 5-айниң 18-күни вевиска есип иш башлиған болуп, уйғур аптоном районлуқ мәдәнийәт-саяһәт назаритиниң секритари хо хәнмин өзи биваситә келип, наһийәлик партком секритари билән бирликтә вевиска асқан һәмдә бу орунни "җуңхуа мәдәнийити арқилиқ шинҗаңни яшартиш қурулуши" ниң йәнә бир намайәндиси сүпитидә тәшвиқ қилған. Бу көргәзмә орнида хитай мәдәнийитигә аит хәттатлиқ, рәсим көргәзмиси, музика, тиятир, чайчилиқ, қол һүнәр буюмлири қатарлиқ көплигән "җуңхуа мәдәнийәт паалийәтлири" өткүзүлидикән.

Көзәткүчиләрниң қаришичә, хитай даирилири 20 йил мабәйнидә уйғур мәдәнийитини суслаштуруштин уни йоқ қилишқа өткән болуп, қәдимий кочилар, биналар, мәсчитләрни чеқип вәйран қилған; алимлар, сәнәткарлар, һүнәрвәнләр, омумән уйғур мәдәнийитини җанландуруп келиватқан сәрхилларни набут қилған; хитай һөкүмити бу бошлуқни аталмиш "җуңхуа мәдәнийити" арқилиқ толдурушқа вә бу арқилиқ хитай еңини мәҗбурий сиңдүрүшкә урунмақта икән. Хитайниң бу мәдәнийәт һуҗуми давамлашқан муддәтчә уйғур мәдәнийитиниң хараплишиш вә унтулуш хәвпи күчийидикән, шуңа дуня җамаәтчилики уйғур мәдәнийитини қутқузуш ишиға һәргиз сәл қаримаслиқи керәк икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт