Kabulda hazare namayishchilirigha qaritilghan adem bomba hujumi yüz bérip, 80 adem öldi

Muxbirimiz jüme
2016.07.24


Shenbe küni kabulda hazare namayishchilirigha qaritilghan adem bomba hujumi yüz bérip, 80 adem ölgen, 230 din artuq adem yarilan'ghan. Hujumni atalmish islam döliti - “Da'ish” özliri qilghanliqini bildürgen.

Weqe namayishchilar kabulning dehmazang meydanigha kelgende yüz bergen. Eyni chaghda namayish meydanida minglighan hazare namayishchi yuqiri bésimliq éléktr liniyesining öz rayonini atlap ötüp ketkenlikige naraziliq bildürüwatqan iken.

Melum bolushiche, kabul hökümiti ottura asiyani jenubiy asiyagha tutashturidighan yuqiri bésimliq tok liniyisining yölinishini eslidiki pilan qilin'ghan bamiyan ölkisidin özgertip, salang rayonigha yötkep ketken.

Xewerlerge qarighanda, bamiyan ölkisi hazare milliti topliship olturaqlashqan rayon bolup, hökümetning tok liniyisini özgertish qarari bularning naraziliqini qozghighan.

Hazareler islam dinining shi'e mezhipidiki étnik guruppa bolup, ularning sünniy mezhipidikiler köp sanliqini igileydighan afghanistanda diniy we irqiy kemsitishke uchrap kelgenliki melum.

Bu 500 kilowatliq tok linyesi türkmenistan - özbékistan - tajikistan - afghanistan - pakistan linyesi dep atilidighan bolup, bu arqiliq énérgiye bay ottura asiya éléktr énérgiyesini afghanistan we pakistan qatarliq döletlerge erzan bahada teminlesh meq'et qilin'ghan. Asiya tereqqiyat bankisi we dunya bankisi ortaq meblegh salghan bu liniye qurulushining liniye pilani 2013 - yilila tamamlinip bolun'ghan.

Halbuki, liniyide özgirish bolghandin kéyin, hazare xelqi 2016 - yili yanwardin buyan afghanistanning bir qisim sheherliride namayishlarni orunlashturghan.

Ular shenbe küni yene bir qétim namayish qilip, hökümetning liniyeni özgertish qararigha yene naraziliq bildürgen.

Halbuki, namayish qanliq axirlashqan. Eljezirening xewirige qarighanda, hujumdin kéyin bayanat élan qilghan “Da'ish” guruhi özlirige tewe ikki hujumchining “Bedinige bombilarni téngip kabuldiki shi'elerge hujum qilghan” liqini bildürgen.

Afghanistan sehiye ministiri muhemmed isma'il kawosi ölgenler sanining yene éshishi mumkinlikini éytqan.

Afghanistan prézidénti eshraf gheni özining mezkur hujumdin chongqur qayghugha chömgenlikini we térroristlarni eyibleydighanliqini bildürgen.

Mezkur hujum yéqinqi aylardin buyan afghanistanda yüz bergen eng qanliq hujumlarning biri hésablinidiken.



Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.