Bu yil Uyghur élide yene 76 ming neper kadir yéza-kentlerge ewetilidiken

Muxbirimiz irade
2018-01-31
Élxet
Pikir
Share
Print

Uyghur rayon da'iriliri bu yil yene 12ming xizmet etriti we 76 ming neper kadirni asasiy qatlamgha chüshüridiken. "Shinjang géziti" ning charshenbe künidiki xewiridin qarighanda, Uyghur rayon da'iriliri asasiy qatlamning muqimliqigha kapaletlik qilish üchün 2017-yilida "Kentte turushluq kadirlar xizmet etriti" dégen nam bilen töwen'ge chüshürülgen kadirlar qoshunining 60 pirsentini dawamliq yene kentlerde élip qélishni we yene yéngidin 40 pirsent kadirni töwen'ge chüshürüshni qarar qilghan iken. Qarargha asasen, 2018-yilining kirishi bilen yene 76 ming neper kadir töwen'ge chüshürülüshke bashlighan, ularning xizmet mudditimu 3 yilgha uzartilghan.

Mezkur xewerdin ashkarilinishiche, Uyghur rayon da'iriliri ilgirikidin perqliq halda kentlerning partiye birinchi sékrétarlirinimu ürümchi belgiligen kadirlardin yaki "Bingtu'en" we yaki xitay merkizi hökümitining Uyghur diyaridiki idarilirining kadirliridin békitishke bashlighan. 

Chet'ellerdiki Uyghur közetküchilerning qarishiche, yuqiridiki qarardin qarighanda Uyghurlar zich olturaqlashqan jenubiy wilayetlerdiki kent sékrétarlirining xitaylardin békitilishi omumliship, yuqirisi Uyghur aptonom rayonluq partkom sékrétaridin tartip, wilayet, nahiye, yéza-kentlergiche bolghan pütün bashqurush sistémisida bir tutash xitay sékrétarlar hemmini qattiq bashqurush tori hasil qilinidiken. Inkaslardin melum bolushiche, xitay kompartiyisi Uyghur diyarini igiligen 67 yildin buyan "Partiye hemmige yétekchilik qilidu" dégen sho'ar bilen her derijilik partiye sékrétarliq hoquqini pütünley dégüdek xitaylarning igilishini kapaletke ige qilip kelmekte idi. 

Nöwette, xitay hökümiti Uyghur élidiki asasiy qatlamni ching tutush we asasiy qatlam kadirlirini bashqurushni muqimliq yaritish we kücheytishtiki hel qilghuch amil süpitide ching tutmaqta. Ular bir qanche yilidin buyan zor sandiki kadirlarni yéza-kentlerge ewetip, ularni öymu-kirip, partiye teshwiqatini qilish, esebiylikke qarshi nutuq sözlesh we hetta yézilardiki "Qosh til" yeslilirini bashqurush, xitay tili ögitish qatarliq ishlargha salmaqta.

Toluq bet